თბილისის განვითარების ფონდის მიერ ნარიყალას ციხის რეაბილიტაციაზე გამოცხადებული ტენდერი დასრულდა. შესაბამისად, ცნობილია უკვე კომპანია, რომელიც ციხეს რეაბილიტაციას ჩაუტარებს. ამ დროისთვის გამარჯვებულ კომპანიასთან ხელშეკრულების გაფორმების პროცედურა მიმდინარეობს.
ციხის რეაბილიტაციას შპს ინსი ჩაატარებს. სამეწარმეო რეესტრის მიხედვით, კომპანია 2010 წლის იანვარში დარეგისტრირდა. რეესტრის ბოლო ამონაწერით, კომპანიის 100%-იან წილს ნიკოლოზ ჩიქოვანი ფლობს. კომპანიის გენერალური დირექტორი ზვიად თოიძეა.
ნიკოლოზ ჩიქოვანი წილებს ფლობს „არსენალი რეზიდენსში“, „კენტ თაუერში“, „ვინორამაში“ , ჯამში 9 კომპანიაში.
აღსანიშნავია, რომ შპს ინსი 2023 წლის დეკემბერში შესყიდვების სააგენტომ ე.წ. თეთრ სიაში შეიყვანა.
ცნობისათვის, თბილისის განვითარების ფონდმა ნარიყალას რეაბილიტაციასთან დაკავშირებით ტენდერი თებერვლის დასაწყისში გამოაცხადა.
სატენდერო დოკუმენტაციის მიხედვით, პროექტი 2-წლიანია და რეაბილიტაცია 2025 წელს დასრულდება. შესყიდვის ღირებულება 13 162 286 ლარია, საიდანაც 2024 წელს დაიხარჯება – 5 268 648 ლარი, 2025 წელი კი 7 893 638 ლარი.
შეგახსენებთ, რომ ნარიყალას ციხის რეაბილიტაციის დაწყებაზე თბილისის მერმა კახა კალაძემ განცხადება გასული წლის მიწურულს გააკეთა.
როგორც მაშინ კალაძემ თქვა, „პროექტი მოიცავს როგორც გარე პერიმეტრის ძირითადი კედლის საყრდენების რეაბილიტაციას, ისე შიდა პერიმეტრის კეთილმოწყობას, მოწესრიგებას და მხატვრულ-დეკორატიული მინათების მონტაჟს”.
მაშინ ცნობილი გახდა ისიც, რომ რეაბილიტაციის პროცესში ნარიყალას ციხე ვიზიტორებისთვის სრულად არ დაიხურება. ციხის ტერიტორიაზე გადაადგილება მხოლოდ მოსახლეობისთვის საფრთხის შემცველი სამუშაოების დროს შეიზღუდება.