უკრაინული დაზვერვა ომის წლისთავზე დარტყმის განხორციელებას აპირებდა რუსეთის ტერიტორიაზე, მაგრამ გეგმები შეერთებული შტატების მოთხოვნით შეცვალა.
Washington Post წერს, რომ უკრაინის თავდაცვის სამინისტრო ომის წლისთავისთვის რუსეთის ობიექტებზე თავდასხმას აპირებდა.
ამის შესახებ პენტაგონის საიდუმლო ცნობების გაჟონვის შედეგად გახდა ცნობილი.
ერთ-ერთი საიდუმლო დოკუმენტის თანახმად, უკრაინის სამხედრო დაზვერვის სამმართველოს ხელმძღვანელმა, კირილ ბუდანოვმა, გასცა ბრძანება, ნოვოროსიისკში ზღვიდან განხორციელებულიყო დარტყმა.
დოკუმენტი, რომელშიც ნათქვამია ბუდანოვის ბრძანების შესახებ, 13 თებერვლით თარიღდება. ამ დღეს აშშ-ის სახელმწიფო დეპარტამენტმა ამერიკელებს მოუწოდა, დაუყოვნებლივ დაეტოვებინათ რუსეთი, თუმცა, როგორც Washington Post წერს, ამ მოვლენებს შორის კავშირის შესახებ რაიმე მტკიცებულება არ არსებობს.
გასაიდუმლოებული დოკუმენტების თანახმად, უკრაინის სამხედრო შტაბმა შეერთებული შტატების მოთხოვნით, გეგმები შეცვალა და რუსეთის ტერიტორიას აღარ დაარტყა.
კონკრეტულად ვინ ჩაერია და როგორ მოხდა უკრაინის სამხედრო დაზვერვის ხელმძღვანელობის დარწმუნება, დოკუმენტებში არ ჩანს.
გამოცემას მომხდარის ასახსნელად ორი ვერსია აქვს. პირველი ის არის, რომ შეერთებული შტატები, რუსეთის პირდაპირი კონფლიქტის თავიდან აცილების მიზნით, ცდილობს, უკრაინამ დასავლელი მოკავშირეებისგან მიღებული იარაღი რუსეთის ტერიტორიაზე თავდასხმებისთვის არ გამოიყენოს. ამასთანავე, აშშ-ს რუსეთის ბირთვული იარაღის შიში აქვს.
მეორე ვერსია ის არის, რომ დასავლური დაზვერვის სამსახურები ბუდანოვის საუბრებს უსმენენ. როგორც ჩანს, მისთვის ეს მოულოდნელი არ იქნება, რადგან, როგორც უკრაინის დაზვერვის სამსახურის ხელმძღვანელმა Washington Post-თან ინტერვიუში განაცხადა, ოფისში მუსიკას ან „თეთრ ხმაურს“ რთავს, რათა მოსმენები გართულდეს. არც ბუდანოვს და არც ამერიკის ხელისუფლების წარმომადგენლებს უკრაინის დაზვერვის გეგმების შესახებ კომენტარი არ გაუკეთებიათ.
