Yandex-მა მთლიანად გამოისყიდა Uber-ის წილი ერთობლივი კომპანია Yandex Taxi-დან. ტრანზაქციის ღირებულება $702,5 მილიონია.
Yandex Taxi-მ და Uber-მა ერთობლივი კომპანია MLU B.V, რომელიც რეგისტრირებულია ნიდერლანდებში, 2018 წელს შექმნეს. კომპანია მართავდა ერთობლივ ბიზნესს Yandex Go-სა და Yango-ს ბრენდებით, ხოლო რუსეთსა და დსთ-ს რამდენიმე ქვეყანაში მუშაობდა Uber-ის ბრენდის ქვეშ. ერთობლივ კომპანიაში Yandex-მა 100 მილიონის ინვესტიცია ჩადო, ხოლო Uber-მა $225 მილიონი დააბანდა.
2021 წელს Yandex-მა Uber-ისგან $1 მილიარდად იყიდა Yandex Food-ის, Yandex Lavka-სა და Yandex Delivery-ის აქციები.
ახლა უკვე Yandex-მა გამოისყიდა ამერიკული Uber-ის დარჩენილი წილი Yandex.Taxi-ის ჯგუფში. ამავე დროს, მხარეებმა გააფორმეს შეთანხმება, რომელიც ითვალისწინებდა Uber-ისგან დარჩენილი წილის $1,8-2 მილიარდად შეძენას 2023 წლის სექტემბრამდე.
უკრაინაში ომის დაწყების შემდეგ Uber-მა განაცხადა, რომ სწრაფად სურდა წილის გაყიდვა და საბოლოოდ მის ფასდაკლებით გასხვისებას დათანხმდა.
გარიგების შედეგად, Yandex გახდა კომპანიების ჯგუფის ერთადერთი მფლობელი, რომელიც მოიცავს ტაქსის მომსახურებასა და ავტომობილებისა და სკუტერების დაქირავების სერვისს.
