TBC Capital-ს საქართველოში ინვესტიციების შემოდინებასთან დაკავშირებით ოპტიმისტური პროგნოზი აქვს. საინვესტიციო კომპანია ვარაუდობს, რომ საინვესტიციო აქტივობა წელსაც მაღალი იქნება.
ოფიციალური სტატისტიკით, 2022 წელს ქვეყანაში პირდაპირი უცხოური ინვესტიციების მოცულობა წინა წელთან შედარებით 61%-ით გაიზარდა. TBC Capital-ის ეკონომისტები ასეთ მაჩვენებელს, ეკონომიკური ზრდის პირობებში ლოგიკურად მიიჩნევენ. მათი შეფასებით, მნიშვნელოვანია, რომ მატება არა მხოლოდ რეინვესტირების ხარჯზე იყო, არამედ გაიზარდა ახალი ინვესტიციების შემოდინებაც.
TBC Capital-ს უცხოური ინვესტიციებისთვის ხელისშემშლელ ფაქტორებად მიაჩნია:
-ლარში და საერთაშორისო ბაზრებზე ვალუტაში გაზრდილი საპროცენტო განაკვეთები
-რეგიონში არსებული რთული გეოპოლიტიკური ვითარება
-მიგრაციის ნაკადსა და ლარის გამყარების მდგრადობასთან დაკავშირებული კითხვები.
მიმოხილვაში აღნიშნულია, რომ ლარის კურსის გამყარების საკითხი მნიშვნელოვანია იმ თვალსაზრისით, რომ საქართველოში გრძელვადიანი პროექტების დაფინანსება უმეტესწილად უცხოურ ვალუტაში ხდება.
