თბილისში საცხოვრებელი ბინების გასაყიდი ფასი დოლარში წელს 21%-ით, ხოლო ქირა 53%-ით გაიზრდება, – ასეთია TBC Capital-ის ანალიტიკოსების პროგნოზი.
მათ უძრავი ქონების ბაზრის მიმოხილვა თებერვალში ჩაატარეს. პროგნოზის მიხედვით, 2023 წლის დეკემბერში ბინების გასაყიდი ფასი 7.1%-ით, გასაქირავებელი ფასი კი 10.4%-ით გაიზრდება 2022 წლის დეკემბერთან შედარებით.
2023 წლის თებერვალში თბილისში სულ 746 ახალი ბინა გაიყიდა, რაც 2022 წლის თებერვალთან შედარებით, 5%-ით მეტია. აღსანიშნავია, რომ ზრდა წინა თვესთან შედარებით გაცილებით უფრო საგრძნობი აღმოჩნდა (+36%).
რაც შეეხება ძველი ბინების გაყიდვას, წლიური ზრდა 14%-ს გაუტოლდა, ხოლო წინა თვესთან შედარებით 15%-ანი მატება დაფიქსირდა. შედეგად, 2023 წლის თებერვალში ახალი ბინების წილი მთლიან ტრანზაქციებში 22%-მდე არის გაზრდილი.
ახალი ბინების საშუალო გასაყიდი ფასი ერთ წელიწადში 27%-ით, ხოლო ძველი ბინებისთვის 30%-ით არის გაზრდილი.
