Silicon Valley Bank (SVB) აღარ არსებობს. იმის შემდეგ, რაც ბანკის გადახდისუნარიანობასთან დაკავშირებით ინვესტორებს ეჭვი გაუჩნდათ, მომხმარებლებმა აქტიურად დაიწყეს დეპოზიტების გატანა. ამან აუცილებელი გახადა Federal Deposit Insurance Corporation (FDIC)-ის ჩარევა. ბანკი სწრაფად ჩამოიშლა. რამდენიმე დღეში SVB-ს $2 მილიარდიანი ზარალი უფიქსირდებოდა. ბანკის აქციები 60%-ით გაუფასურდა და არაერთმა ფინანსურმა მრჩეველმა კლიენტებს კომპანიის საინვესტიციო პორტფელიდან აქციების გატანა ურჩია. გასულ პარასკევს 40 წლიანი ისტორიის ბანკმა არსებობა შეწყვიტა.
რამ გამოიწვია ეს ყველაფერი? SVB აფინანსებდა აშშ-ის სტარტაპ ეკოსისტემის დიდ ნაწილს, რაც შესაძლებელი გახადა ფედერალური რეზერვის მიერ დაწესებულმა უკიდურესად დაბალმა საპროცენტო განაკვეთებმა (SVB-ს დეპოზიტების რაოდენობა გასამმაგდა 2018 წლიდან 2021 წლამდე), თუმცა,როცა გასულ წელს განაკვეთები გაიზარდა, შემცირდა როგორც დეპოზიტების რაოდენობა, ისევე ობლიგაციების ღირებულება, რომლებიც ბანკმა ამ დეპოზიტებით შეიძინა.
ამ სიახლემ მთლიანი საფინანსო სექტორის მიმართ უარყოფითი განწყობა შექმნა. თუმცა, აღსანიშნავია, რომ დღეს ბანკები ბევრად უკეთ არიან მომზადებულები მსგავსი სცენარისთვის ვიდრე 2008 წელს იყვნენ. შესაბამისად, კიდევ ერთი ფინანსური კრიზისი ნაკლებად სავარაუდოდ მიიჩნევა.
ხელოვნური ინტელექტის აქციები დაეცა: აქციები, როგორიცაა C3.ai (AI), BigBear.ai Holdings (BBAI) და SoundHound AI(SOUND) დაეცა მას შემდეგ, რაც US Chamber of Commerce-მა განაცხადა, რომ ხელოვნური ინტელექტის ინდუსტრიის დარეგულირებას აპირებს. 14-გვერდიან რეპორტში წერია, რომ ხელოვნური ინტელექტის ტექნოლოგიებს შეუძლიათ გლობალური მშპ $13 ტრილიონით გაზარდონ მომდევნო დეკადის განმავლობაში, თუმცა, მათ ასევე ექნებათ გავლენა ისეთ დარგებზე, როგორიცაა ეროვნული უსაფრთხოება. აღსანიშნავია, რომ EU ასევე აპირებს მსგავსი ნაბიჯის გადადგმას.
უორენ ბაფეტი აგრძელებს Occidental Petroleum (OXY)-ს აქციების შეძენას: Berkshire Hathaway-მ გააგრძელა ენერგო კომპანიის აქციების შეძენა და უკვე დაახლოებით 22%-ს ფლობს. ეს ნიშნავს, რომ ბაფეტი უკვე 200.2 მილიონ აქციას ფლობს კომპანიაში, რომელთა ღირებულებაც $12.2 მილიარდს შეადგენს. წლიური დივიდენდები ამ ჰოლდინგიდან სავარაუდოდ $144 მილიონს შეადგენს. შეგახსენებთ რომ Occidental Petroleum-ის აქციების ფასი, რომელიც უორენ ბაფეტის საინვესტიციო პორტფელის ტოპ 10 ჰოლდინგში შედის, გასულ წელს 200%-ზე მეტად გაიზარდა.
წყარო: Galt&Taggart
