ნავთობის ექსპორტიორი ქვეყნების ორგანიზაცია (OPEC) ვარაუდობს, რომ 2023 წელს ნავთობის დღიური მოხმარება დაახლოებით 101,9 მილიონი ბარელი იქნება, 2,3%-ით მეტი, ვიდრე 2022 წელს.
OPEC-ის შეფასებით, ევროპის ინდუსტრიულ ქვეყნებში დღიური მოხმარება გასულ წელთან შედარებით 0,3%-ით, 13,46 მილიონ ბარელამდე შემცირდება, რაც მაკროეკონომიკური მაჩვენებლების შესუსტება განაპირობებს.
OPEC შემცირების მიზეზად ევროპაში მაღალ ინფლაციას ასახელებს. იმის მიუხედავად, რომ ინფლაცია 9.2%-მდე დაეცა, ევროპის ცენტრალური ბანკის მიერ დადგენილ 2%-იან სამიზნე მაჩვენებელზე მაინც ბევრად მაღალი რჩება, – აღნიშნავს OPEC.
ორგანიზაცია დარწმუნებულია, რომ მესამე კვარტალში მოხმარება შედარებით მოიმატებს, რაც საავიაციო საწვავსა და ბენზინზე მოთხოვნის ზრდით იქნება გამოწვეული. თუმცა, მიიჩნევს, რომ რისკები მაინც რჩება, რადგან ევროპის რეგიონში რეცესიის საფრთხე კვლავაც არსებობს.
ჩინეთში და ინდოეთში OPEC მოთხოვნის 5%-ით ზრდას ელოდება გასულ წელთან შედარებით. მისი გამოთვლების მიხედვით, ორი აზიური გიგანტის დღიური მოხმარება ერთად 2023 წელს 21 მილიონი ბარელი იქნება, რაც გლობალური მოხმარების 20%-ია.
ორგანიზაციის მონაცემებით, ჩინეთში, შიდა გადაადგილებისა და საჰაერო მიმოსვლის ინტენსივობა პანდემიამდელი დონის 80%-ს უახლოვდება.
OPEC-ის პროგნოზით, ლათინურ ამერიკაში ნავთობის მოხმარება გაიზრდება 0,16%-ით, რაც წინა ანგარიშში გათვლილ დონესთან ახლოსა.
