გაზრდილი ტარიფების გამო Nissan შეამცირებს აშშ-ში მისი ყველაზე პოპულარული მოდელის Rogue-ის წარმოებას. ამის შესახებ ინფორმაციას Reuters-ი საკუთარ წყაროზე დაყრდნობით ავრცელებს.
აშშ-ის პრეზიდენტის დონალდ ტრამპის გადაწყვეტილებამ, უცხოეთში წარმოებულ მანქანებზე 25%-იანი ტარიფის დაწესების შესახებ, ავტომობილების გლობალური ქსელი შეაფერხა. ავტობიზნესი იძულებულია, შეცვალოს წარმოების გეგმები.
Nissan, იაპონიის სიდიდით მესამე ავტომწარმოებელი, უფრო დაუცველი გახდა, ვიდრე ზოგიერთი კონკურენტი. შეერთებული შტატები მისთვის გასაღების მთავარი ბაზარია, რომელზეც შარშან გაყიდვების მეოთხედზე მეტი მოდიოდა.
ამ ბრენდის ავტომობილების დიდი ნაწილი იაპონიაში ან მექსიკაშია დამზადებული. Nissan გეგმავს Rogue-ის წარმოების შემცირებას 13000 ავტომობილით კიუშუს ქარხანაში, სამხრეთ-დასავლეთ იაპონიაში. Nissan-ის უმსხვილეს ქარხანაში დასაქმებულ მუშებს სამუშაო საათებსაც შეუმცირებენ მაის-ივნისში, ასევე წარმოება რამდენიმე დღით გაჩერდება კიდევაც.
შეგახსენებთ, რომ ორშაბათს დონალდ ტრამპმა თქვა, რომ აპირებს ავტომანქანებსა და ნაწილებზე იმპორტის გადასახადის დროებით გაუქმებას, რათა ავტომწარმოებლებს მეტი დრო მისცენ აშშ-ში წარმოების დასაწყებად.
