საერთაშორისო რესპუბლიკური ინსტიტუტის – IRI-ის მიერ გამოქვეყნებული ახალი კვლევის მიხედვით. გამოკითხულთა 89% მხარს უჭერს ევროკავშირში გაწევრიანებას.
ამასთან, 77% იმ შემთხვევაშიც უჭერს მხარს, თუ ეს რუსეთთან ვაჭრობის შეჩერებას გამოიწვევს.
გამოკითხვამ აჩვენა, რომ მოსახლეობის მხოლოდ 5% ეწინააღმდეგება „მკვეთრად” ევროკავშირში გაწევრიანებას.
გამოკითხულთა 60%-ს მთავარ ეკონომიკურ პარტნიორად ევროკავშირი მიაჩნია.
კითხვაზე, „რა იქნება მთავარი სარგებელი, თუკი საქართველო გაწევრიანდება ევროკავშირში?” – გამოკითხულთა 45%-მა უპასუხა – „ეკონომიკის გაძლიერება”.
ევროკავშირში გაწევრიანების გზაზე მთავარ დაბრკოლებად გამოკითხული მოქალაქეების ყველაზე დიდი ნაწილი (34%) „პოლიტიკურ არასტაბილურობას” ასახელებს, 17%-ის აზრით, ამის მიზეზი ასოცირების შეთანხმებით გათვალისწინებული ვალდებულებების შეუსრულებლობა იქნება.
კვლევის მიხედვით, გაზრდილია ჩრდილოატლანტიკურ ალიანსში (NATO) გაწევრიანების მხარდამჭერების რიცხვიც – 80%. გამოკითხულთა 65% სრულად უჭერს მხარს NATO-ში გაწევრიანებას, 15% კი – ნაწილობრივ.
მოსახლეობის 77%-ს მმართველობის საუკეთესო ფორმად დემოკრატია მიაჩნია.
87% მთავარ საფრთხედ მიაჩნევს რუსეთს;
56% თვლის, რომ „აგენტების კანონი“ საქართველოს რუსეთთან დააახლოებდა და მედიას/ენჯეოებს გააჩუმებდა. საწინააღმდეგოს 22% ფიქრობს;
38% თვლის, რომ ქართული ოცნების საგარეო პოლიტიკა პროდასავლურია, 45% კი თვლის, რომ პრორუსულია. 17%-მა არ იცის/არ უპასუხა.
გამოკითხვა 2023 წლის 4-23 მარტის პერიოდში ჩატარდა. პირისპირ ინტერვიუს გზით 18 წლისა და უფროსი ასაკის ხმის მიცემის უფლების მქონე მოქალაქეები გამოკითხეს.
