საერთაშორისო სავალუტო ფონდის (IMF) მმართველმა დირექტორმა კრისტალინა გეორგიევამ განაცხადა, რომ უკრაინაში დაწყებულს ომს რუსეთის ეკონომიკისთვის დამანგრეველ შედეგი ექნება და ეს უკვე 2023 წლის შემდეგ გამოჩნდება. ამის შესახებ მან გუშინ, CNN-თან ინტერვიუში განაცხადა.
„ჩვენი საშუალოვადიანი პროგნოზით, რუსეთის ეკონომიკა მინიმუმ 7%-ით შემცირდება“, – თქვა კრისტალინა გეორგიევამ.
მისი თქმით, რუსეთის ეკონომიკა დროთა განმავლობაში აუცილებლად დაზარალდება, რადგან მუშები ემიგრაციაში წავიდნენ, ქვეყანაში ტექნოლოგიებზე წვდომა აღარ აქვს, ხოლო სანქციებმა მის უზარმაზარ ენერგეტიკულ ინდუსტრიას მნიშვნელოვანი ზარალი მიაყენა. სავალუტო ფონდის ხელმძღვანელის თქმით, ნავთობისა და გაზის შემოსავლები რუსეთს 46%-ით შეუმცირდა, წინა წელთან შედარებით.
„მართალია, რუსეთმა ნავთობის ნაწილი ჩინეთსა და ინდოეთში გაყიდვა მოახერხა, მაგრამ ეს რუსეთის ეკონომიკაზე დიდ გავლენას ვერ იქონიებს“, – მიიჩნევს სავალუტო ფონდის ხელმძღვანელი.
ცნობისთვის, ორშაბათს, რუსეთის მთავრობამ გამოაცხადა, რომ ბიუჯეტის დეფიციტმა იანვარ-თებერვალში 2,58 ტრილიონი რუბლი ($34 მილიარდი) შეადგინა, 2022 წლის იმავე პერიოდში, დეფიციტი 415 მილიარდი($5,5 მილიარდი) რუბლი იყო.
როგორც ცნობილია, 5 თებერვალს ემბარგო დაწესდა ევროკავშირში რუსული ნედლი ნავთობისა და ნავთობპროდუქტების საზღვაო მიწოდებაზე.
