შვედური ქსელი IKEA მსოფლიო გიგანტი ხელმისაწვდომი ფასის მქონე ავეჯის წყალობით გახდა, მაგრამ ბოლო წლებში მისთვის ფასის შენარჩუნება სულ უფრო რთული ხდება.
წარმოებას ნედლეული გაუძვირდა. გაიზარდა არა მხოლოდ ლითონის, მინის, ხისა და პლასტმასის ღირებულება, არამედ ტრანსპორტირებაც. მყიდველების შემოსავლები კი ინფლაციამ შეამცირა.
ამ პრობლემებთან გასამკლავებლად, IKEA-მ გადაწყვიტა, თავისი ყველაზე პოპულარული პროდუქტები გადააკეთოს.
კომპანია, რომელიც ჯერ პანდემიით დაზარალდა, შემდეგ უკრაინის ომითა და მაღალი ინფლაციით, არჩევანის წინაშე დადგა: გაზარდოს ფასები მზარდი ხარჯების დასაფარად და კლიენტების დაკარგვის რისკის ქვეშ აღმოჩნდეს, თუ შეინარჩუნოს ფასები და უარი თქვას მოგებაზე.
კომპანიამ ორივე ვარიანტი სცადა. შედეგად, მისი მოგება 2022 წელს, რეკორდული გაყიდვების მიუხედავად, განახევრდა €710 მილიონამდე.
მზარდ ხარჯებთან ბრძოლაში კომპანიას დაეხმარა წიგნის კარადების სერია BILLY, რომელიც მისი ბესტსელერია.
კარადა BILLY თეთრი ფერისაა, ხის ელემენტებით. IKEA-მ კარადის ხარჯების შესამცირებლად, მისი დამზადების მეთოდი რამდენჯერმე შეცვალა. ხან ლაქს ცვლიდა მელანინის ფირით, ხანაც ხეს ანაცვლებდა ნახერხით.
IKEA-მ Billy-ის უფრო ეკონომიური ვერსიის დასამზადებლად, ვინირი ქაღალდის ფოლგით შეცვალა.
კომპანიის დიზაინერებმა გასაშლელი სასადილო მაგიდის ახალი, უფრო ეკონომიური ვერსიაც შეიმუშავეს.
თუ ადრე მაგიდის ფეხები მყარი ხისგან იყო დამზადებული, ახლა ისინი ვინირისგან მზადდება ზემოდან და ქვემოდან ხის ჩანართებით. ამან საგრძნობლად შეამცირა წარმოებისა და ტრანსპორტირების ხარჯები, რადგან ხის გამოყენება 90%-ით შემცირებულია.
IKEA-მ ავეჯში ხე ნაწილობრივ შეცვალა მსუბუქი და ნაკლებად ძვირი პლასტმასით, მაგალითად, უჯრის ზედაპირებში. თუთიის ნაცვლად (რომლის ფასი უკრაინაში ომის დაწყების შემდეგ გაორმაგდა), კომპანია იყენებს გადამუშავებულ ალუმინს. ახლა მისგან ბევრი დეტალი მზადდება, მაგალითად, საკიდები აბაზანისთვის.
ბევრი მიიჩნევს, რომ დაბალი ფასებისთვის ხარისხის შეწირვა სწორი გადაწყვეტილება არ იყო.
