კომპანია GWP ენერგეტიკისა და წყალმომარაგების მარეგულირებელი კომისიას, სავარაუდოდ, ტარიფის გაზრდის მოთხოვნით მიმართავს.
მარეგულირებელმა კომისიამ წყალმომარაგების ტარიფებს წლის ბოლოს უნდა გადახედოს, რადგან წყალმომარაგების სექტორში დადგენილ სამწლიან ტარიფებს ვადა დეკემბერში ეწურება. სემეკ-მა GWP-ს ტარიფსაც უნდა გადახედოს. ტარიფის დასადგენად კი, სემეკ-მა კომპანიის მიერ განხორციელებული ინვესტიციები უნდა გაითვალისწინოს.
ამჟამად კომპანია სემეკთან მომდევნო სამი წლის საინვესტიციო გეგმის შეთანხმებაზე აწარნოებს მოლაპარაკებებს.
როგორც GWP-ის გენერალურმა დირექტორმა ირაკლი ბაბუხადიამ განაცხადა, ტარიფის გაზრდა-შემცირება იმაზე იქნება დამოკიდებული, კომპანია მომავალში რა სახის ინვესტიციებს განახორციელებს.
„მთავარი არის ის, რა სახის ინვესტიციები გაკეთდება, რა არის ქსელისთვის საჭირო, რაზე შევთანხმდებით, რომელ პერიოდში რა უნდა გაკეთდეს“, – განაცხადა ირაკლი ბაბუხადიამ.
მისი თქმით, კომპანია წყალმომარაგების ამორტიზებული ქსელის გამოსაცვლელად წელს 200 მილიონი ლარის ინვესტიციას უკვე ახორციელებს. სამომავლოდ რეაბილიტაციისთვის კიდევ უფრო მეტი ინვესტიცია ჩაიდება.
GWP-ის მფლობელი კომპანიის – GGU-ს 80%, 2022 წელს, ესპანურმა Aqualia-მ $180 მილიონად შეიძინა. Aqualia 2025-2026 წლებში კომპანიის დარჩენილი წილის გამოსყიდვასაც გეგმავს.
კანონმდებლობის მიხედვით, კომისიასთან შეთანხმებული საინვესტიციო გეგმით, უნდა მოხდეს აქტივების საინვესტიციო ღირებულების შეფასება (მშენებლობა, შეძენა, კაპიტალური რემონტი და ა.შ.)
საწარმო ვალდებულია დაასაბუთოს განსახორციელებელი ინვესტიციების აუცილებლობა, აგრეთვე, ამ ინვესტიციის განხორციელების შედეგად მისაღები ეფექტი და სარგებელი.
თუ წლის საინვესტიციო გეგმის ღირებულების სავარაუდო ცვლილება აღემატება 10%-ს დადებითი ან უარყოფითი ნიშნით, საწარმო ვალდებულია აღნიშნული ცვლილებები წინასწარ შეათანხმოს კომისიასთან.
თუ საწარმოს მიერ დაგეგმილი ინვესტიციები არ განხორციელდა კომისიასთან შეთანხმებული საინვესტიციო გეგმის, ასეთი ინვესტიციები განიხილება როგორც დაუმთავრებელი მშენებლობა და აღნიშნულ ინვესტიციაზე საწარმოს მიერ მიღებული კაპიტალური დანახარჯები ექვემდებარება კორექტირებას წინამდებარე მეთოდოლოგიის შესაბამისად.
თუ საწარმო კომისიას არ წარუდგენს საინვესტიციო გეგმას და არ შეუთანხმებს განსახორციელებელ საინვესტიციო პროექტებს, კომისია უფლებამოსილია ტარიფის გაანგარიშებისას არ გაითვალისწინოს საწარმოს მიერ შესაბამის პერიოდში ფაქტობრივად განხორციელებული შეუთანხმებელი ინვესტიცია, რომელიც არ იქნება მიჩნეული გონივრულად.
