შეერთებული შტატების ფედერალურმა რეზერვმა (Fed), როგორც მოსალოდნელი იყო, საპროცენტო განაკვეთი 0,25%-ით გაზარდა. ეს, გასული წლის მარტის შემდეგ, განაკვეთის მეათე კორექტირებაა ზრდის მიმართულებით. განაკვეთი 5-5,25%-მდე გაიზარდა, რაც ყველაზე მაღალია ბოლო 15 წლის განმავლობაში.
Fed ზრდის საპროცენტო განაკვეთს, რათა შეამციროს ინფლაცია. გაზრდილი განაკვეთი აძვირებს საბანკო სესხებს, შესაბამისად, მცირდება დაკრედიტება და ეკონომიკური აქტივობა, რაც თავის მხრივ, ინფლაციის კლებას გამოიწვევს.
განაკვეთის ზრდა მოსალოდნელი იყო, საბანკო სექტორში არსებული პრობლემების ფონზე, რაც სამი კომერციული ბანკის გაკოტრებამ გამოიწვია.
Fed-ის განცხადებაში, რომელიც სხდომის შემდეგ გაკეთდა, ხაზგასმულია, რომ განაკვეთის შემდგომი ზრდა დამოკიდებული იქნება ფინანსურ სისტემაში განვითარებულ მოვლენებზე და ინფლაციის დონეზე.
Fed-მა ასევე აღნიშნა, რომ კრედიტების გაძვირება, სავარაუდოდ, შეანელებს ამერიკის ეკონომიკას, რაც ცენტრალურ ბანკს ინფლაციის სამიზნე მაჩვენებლის მიღწევაში დაეხმარება.
