Instagram-ისა და Facebook-ის მომხმარებლებმა ვერიფიკაციის ლურჯი ნიშნის მისაღებად უნდა გადაიხადონ. Meta-ს აღმასრულებელი დირექტორის – მარკ ცუკერბერგის თქმით, ეს მათი აპლიკაციების უსაფრთხოებასა და ავთენტურობას გააუმჯობესებს
მომხმარებლებს ლურჯი ნიშანი, მათი პოსტების ხილვადობის გაზრდის, იმიტატორებისგან დაცვისა და მომხმარებელთა სერვისზე უფრო მარტივად წვდომის საშუალებას მისცემს, – ნათქვამია კომპანია Meta-ს განცხადებაში.
Meta ვერიფიკაცია ინტერნეტ მომხმარებლებისთვის თვეში $11,99, ხოლო iPhone-ის მომხმარებლებისთვის $14,99 ეღირება.
ჯერჯერობით ეს სერვისი ხელმისაწვდომი იქნება ავსტრალიასა და ახალ ზელანდიაში. მარკ ცუკერბერგმა განაცხადა, რომ ის სხვა ქვეყნებშიც „მალე” გახდება ხელმისაწვდომი.
ეს ნაბიჯი Meta-მ მას შემდეგ გადადგა, რაც 2022 წლის ნოემბერში Twitter-ის მფლობელმა ილონ მასკმა პრემიუმ Twitter Blue-ს გამოწერა დანერგა.
როგორც ცნობილია, Meta-მ ნოემბერში 11 000 სამუშაო ადგილი შეამცირა, რაც Covid-19-ის პანდემიის დროს დიდი მოცულობის ინვესტიციების განხორციელებით ახსნა. მარკ ცუკერბერგმა განაცხადა, რომ მას პანდემიის დროს კომპანიის შემოსავლების მნიშვნელოვნად ზრდის იმედი ჰქონდა, მაგრამ ეს ასე არ მოხდა.
