CNN ამერიკელ ოფიციალურ პირებზე დაყრდნობით იტყობინება, რომ ბოლო თვეებში შეერთებულმა შტატებმა შეამცირა უკრაინისთვის სამხედრო დახმარება, რაც საკუთარი რეზერვების სიმცირემ განაპირობა.
აპრილში პენტაგონმა კიევისთვის $1 მილიარდის სამხედრო დახმარების პაკეტი გამოყო. მას შემდეგ არცერთი პაკეტი $400 მილიონზე მეტი არ ყოფილა. ზოგი კი კიდევ უფრო მცირე იყო – $125 მილიონი და $250 მილიონი. როგორც CNN აღნიშნავს, 2022 და 2023 წლებში პენტაგონი რეგულარულად აძლევდა უკრაინას 600-დან 800 მილიონ დოლარამდე სამხედრო დახმარების პაკეტებს. ყველაზე დიდი დახმარება კი, რომელიც 2023 წლის იანვარში გამოიყო, $2,85 მილიარდს შეადგენდა.
ჯო ბაიდენის ადმინისტრაციას $6 მილიარდი აქვს გათვალისწინებული უკრაინის შეიარაღებისთვის, მაგრამ ორწლიანი ომის შემდეგ, პენტაგონს საკმარისი მარაგი არ აქვს, ამბობენ ამერიკელი ოფიციალური პირები.
CNN-ის კიდევ ერთმა წყარომ აღნიშნა, რომ ვაშინგტონი ცდილობს კიევში ერთდროულად ბევრი იარაღი არ გაგზავნოს.
ტელეკომპანიის მიერ გავრცელებული მონაცემების მიხედვით, უკრაინის ომამდე აშშ ყოველთვიურად დაახლოებით 15 ათას 155 მმ-იან საარტილერიო ჭურვს აწარმოებდა. ახალი ქარხნებისა და საწარმოო ხაზების გახსნის შემდეგ ეს მაჩვენებელი ახლა თვეში 40 ათას ჭურვამდე არის გაზრდილი.
პენტაგონი გეგმავს წარმოების 100 ათასამდე გაზრდას, მაგრამ ამას დასჭირდება ბევრად მეტი დრო, ახალი სიმძლავრეები, ქარხნის გაფართოება და კონგრესის თანხმობა თანხის გამოყოფაზე. ბოლოს შეერთებულმა შტატებმა უკრაინას სამხედრო დახმარების პაკეტი 2024 წლის 6 სექტემბერს გამოუყო. პენტაგონმა კიევს $250 მილიონის ღირებულების რაკეტები, საბრძოლო მასალა, ჭურვები და სხვა იარაღი გადასცა.
აშშ-ის პრეზიდენტის ეროვნული უსაფრთხოების მრჩეველმა ჯეიკ სალივანმა მოგვიანებით განაცხადა, რომ ვაშინგტონი უკრაინისთვის დახმარების პაკეტზე მუშაობს, რომლის გამოცხადებას უკვე ამ თვეში აპირებს.
