BBC-მ გამოაქვეყნა ვრცელი საგამოძიებო ფილმი, რომელიც შეეხება ქოლცენტრების თაღლითურ ქსელს, რომლის სათავეში, სავარაუდოდ, საქართველოს ყოფილი თავდაცვის მინისტრი დავით კეზერაშვილი დგას.
ჟურნალისტი სიმონა ვაინგლასი გამოძიებას წელიწადზე დიდხანს აწარმოებდა. ფილმი თაღლითების ქსელს რამდენიმე ქვეყანაში მიჰყვება, მათ შორის აშშ-ში, ბრიტანეთში, გერმანიაში, შვედეთში, ესპანეთსა და საქართველოში.
რესპონდენტები არიან MIlton Group-ის ყოფილი თანამშრომელი, გერმანელი გამომძიებელი, ჟურნალისტები და თაღლითების მსხვერპლები.
ჟურნალისტი ექსპერიმენტისთვის თავად უკავშირდება ქსელში ჩართულ ერთ-ერთ კომპანია Coinevo-ს, დეპოზიტზე ათავსებს $500-ის ღირებულების ბიტკოინს და მიჰყვება იმ გზას, რასაც თაღლითობის მსხვერპლები გადიან.
ჟურნალისტური გამოძიებიდან ჩანს, რომ თაღლითურმა ჯგუფმა 2017 წლიდან მოყოლებული ერთ მილიარდ დოლარამდე მიითვისა.
MIlton-ის ქსელში 152 ბრენდია. ამ ბრენდების ერთმანეთთან კავშირი დგინდება იდენტური ვებსაიტების, გვერდებისა და კოდების მეშვეობით.
ფილმში მხილებულია ქსელში ჩართული კომპანიების დირექტორები და ნაჩვენებია მათი კავშირი დავით კეზერაშვილთან.
ფილმის ერთ-ერთი მთავარი ფიგურანტია დავით თოდუა, რომელსაც ერთ-ერთ კორპორაციულ წვეულებაზე MIlton-ის „დამაარსებელ მამას“ უწოდებენ. დავით თოდუას ქოლცენტრი ჰქონდა კიევშიც, რომელიც MIlton-ის ბრენდის – EverFX-ის გაყიდვებს ემსახურებოდა. რუსეთის უკრაინაში შეიჭრის შემდეგ ქოლცენტრმა საქმიანობა თბილისში გააგრძელა.
თბილისი BBC-ის გამოძიების მნიშვნელოვანი ხაზია. სიმონა ვაინგლასს iFact-ის გამომძიებელი ჟურნალისტი ნინო ბაქრაძე ინფორმაციას აწვდის ერთ-ერთი მოქმედი თაღლითური კომპანიის – MG Capital-ის შესახებ, რომლის დამაარსებელიც დავით თოდუას პარტნიორი იოსებ მგელაძეა.
იოსებ მგელაძე MG Capital-თან ერთად სხვა კომპანიასაც ფლობს, რომლის თანადამფუძნებლები რატი ჭელიძე და გურამ გოგეშვილი არიან. რატი ჭელიძე ფლობდა კომპანია Naspay-ს, რომელიც MIlton ბრენდებს ტექნიკურ უზრუნველყოფას უწევდა. ეს კომპანია მან დავით თოდუას მიჰყიდა.
იოსებ მგელაძის, რატი ჭელიძის, გურამ გოგეშვილის და მაიკლ ბენიმინის საქმიანი პარტნიორობა პანამის დოკუმენტებშიც ჩანს. მათ კომპანიებს საერთო მისამართი აქვთ – პიქსელის შენობა ჭავჭავაძეზე.
ათასობით დოკუმენტის შესწავლის შემდეგ აღმოჩნდა, რომ ამ კომპანიების დიდი ნაწილი დარეგისტრირებული ან დაფუძნებულია დავით კეზერაშვილის მიერ. BBC მას მეტსახელით „მისტერ ოფშორი“ მოიხსენიებს.
BBC-ის ჟურნალისტი გერმანული და ქართული პოლიციის მიერ თბილისში ჩატარებულ ქოლცენტრების რეიდსაც დაესწრო. რეიდის შემდეგ იოსებ მგელაძემ პრესკონფერენცია გამართა და თქვა, რომ მისი კომპანია მხოლოდ ფართის გაქირავებით იყო დაკავებული და კავშირი არ ჰქონდა ქოლცენტრების მუშაობასთან. თუმცა, იოსებ მგელაძე ამ კომპანიის დამაარსებლად არის გაფორმებული და ის ადასტურებს დავით კეზერაშვილთან მეგობრობას. ამბობს, რომ ნამდვილად იყო მის საინვესტიციო კომპანია უნივერსალ კაპიტალ გრუპში. მგელაძე ამბობს, რომ არასოდეს უარყოფს დათო კეზერაშვილთან მეგობრობას. ისევე, როგორც ქართული ოცნების ბევრ მაღალჩინოსანთან.
კეზერაშვილი დაკავშირებულია კომპანიასთან, რომელიც EverFX-ს ფლობდა.
კეზერაშვილის კომპანიებისა და EverFX და MIlton Group-ის ქსელში შემავალ სხვა კომპანიებს საერთო მეილსერვერები აქვთ.
კეზერაშვილს ეკუთვნის შენობა კიევში, სადაც მთავარი ქოლცენტრი იყო განლაგებული.
კეზერაშვილის ფეისბუქგვერდიდან ირკვევა, რომ ის MIlton-ის მინიმუმ 45 მაღალჩინოსანთან მეგობრობს. მაიკლ ბენიმინი კი მისი ბიძაშვილია.
კეზერაშვილმა, ჭელიძემ, გოგეშვილმა და მგელაძემ BBC-ისთან უარყვეს თაღლითობის სქემასთან რაიმე კავშირი. მაიკლ ბენიმინმა ჟურნალისტის კითხვებს არ უპასუხა.
