9 მაისს, France-Press-ის (AFP) 32 წლის ოპერატორი არმან სოლდენი დონბასში ქალაქ ჩასოვ იართან დაბომბვის შედეგად დაიღუპა.
ჟურნალისტი სააგენტოსთან 2015 წლიდან მუშაობდა. ის AFP-ის რეპორტიორების პირველ ჯგუფთან ერთად, უკრაინაში ომის დაწყებიდან მეორე დღესვე გაემგზავრა. სოლდენი მოგვიანებით შეცვალეს, მაგრამ 2022 წლის სექტემბერში ის ისევ დაბრუნდა ფრონტზე.
არმან სოლდენი მეათე უცხოელი ჟურნალისტია, რომელიც უკრაინაში რუსეთის შეჭრის დროს პროფესიული მოვალეობის შესრულებისას დაიღუპა.
BBC-მ სოლდენის ბოლო რეპორტაჟი გამოაქვეყნა, რომელიც ყველაზე ცხელ წერტილში, ბახმუტიდან რამდენიმე კილომეტრში, სამედიცინო პუნქტშია გადაღებული. ეს არის ადგილი, სადაც უკრაინელი დაჭრილი ჯარისკაცები ღამით მიჰყავთ, რათა მათ პირველადი დახმარება გაუწიონ.
რეპორტაჟში არმან სოლდენი ესაუბრება ქირურგ ვლადიმერ პიგულევსკის, რომელიც ამბობს, რომ არის დღეები, როცა სამედიცინო პუნქტში 100 და მეტი დაჭრილი მიჰყავთ. ზოგიერთი ექიმი მთელი თვის განმავლობაში მხოლოდ ორჯერ ახერხებს საოპერაციოდან გასვლას.
დანაშაულისა და სიძულვილით გამოწვეული დანაშაულების წინააღმდეგ ბრძოლის ცენტრალურმა ოფისმა (OCLCH) ჟურნალისტის დაღუპვის ფაქტზე წინასწარი გამოძიება დაიწყო, რათა გარდაცვალების გარემოებები დაადგინოს.
OCLCH-ის ჯგუფი ტრაგედიის ადგილზე მისვლას გეგმავს, სადაც ჟურნალისტი თავის ოთხ კოლეგასთან ერთად იმყოფებოდა, რომლებიც უვნებლად გადარჩნენ.
