საქართველოს სუვერენული ევროობლიგაციები (GEORG) გასულ კვირას 7.01% შემოსავლიანობით ივაჭრებოდა და კვირის ვაჭრობა 94.7-ით დაიხურა. ბოლო 2 კვირაში პოზიცია ოდნავ გაუარესებულია.
G&T-ის მიმოხილვით, ამ დროისთვის ფასიანი ქაღალდის Z-სპრედი 312.65 bps-ია (საბაზისო პუნქტი – %პX100). z-spread ერთგვარი ცვლადია, დისკონტირების სპრედი მის შესადარ აშშ-ს სახაზინო ობლიგაციებთან. ზაფხულში აღნიშნული მაჩვენებელი 265.7-ს შეადგენდა.
ამასთან საგულისხმოა, რომ Fitсh-მა ქვეყნის სუვერენული რეიტინგი არ გააუარესა, BB შეინარჩუნა(ხოლო პერსპექტივა “სტაბილურიდან” “ნეგატიურამდე” შეამცირა), რაც პოზიციონირებაზე მოქმედებს. ამასთან ტრენდი აშშ-ს გრძელვადიან ობლიგაციებს მიყვება.
აშშ-ის ფედერალური რეზერვის შერბილებული პოლიტიკის შესაბამისად განაკვეთი შემცირებულია, რაც გადაეცემა ქართულ ბონდებსაც, სხვა თანაბარ პირობებში, თუ რაიმე წნეხი არ არის სხვა მხრიდან.
ძირითადად გლობალურ ტრენდს მიყვება საქართველოს რკინიგზის ევროობლიგაციაც (GRAIL), თუმცა განაკვეთი გაზრდილია გასულ კვირას 88.2-ად ივაჭრებოდა, 7.9%-იანი შემოსავლიანობით. როგორც იცით, საქართველოს რკინიგზამ (GR) ლონდონის საფონდო ბირჟაზე, 2012 წელს გამოშვებული, $500 მილიონის ბონდები (ვადა 10 წელი, განაკვეთი -7.75%), 7 წლიანი მწვანე ევროობლიგაციებით (განაკვეთი 4%) ვადამდე, 2021 წელს დაფარა. მოზიდული ფული, ძირითადად, 10 წლიანის გადაფარვას მოხმარდა. $50 მლნ -ის მიზნობრიობა იყო ინფრასტრუქტურული პროექტების დაფინანსება.
2021 წლის აპრილშია განთავსებული ქვეყნის სუვერენული 5-წლიანი ბონდებიც, 2.75%-ად. მას შემდეგ, რაც 12.04.2021-ში, ვადა ამოეწურა წინა ემისიას, 2011 წელს ემიტირებულ 10 წლიან ევრობონდებს (6.875%). მისი დაფარვა წელიწად ნახევარში გვიწევს. იმ დროისთვის რამდენად იქნება ხელსაყრელი მორიგი რეფინანსირება, ამას ქვეყნის საგარეო პოლიტიკა გვაჩვენებს, დაუბრუნდება ევროატლანიკურს თუ მას საბოლოოდ გადაუხვევს.
