ნავთობის ექსპორტიორი ქვეყნების გაერთიანების (OPEC) ყოველთვიურ ანგარიშში, რომელიც გუშინ გამოქვეყნდა, ნათქვამია, რომ მოსალოდნელია ორგანიზაციის წევრ ქვეყნებში წარმოების ზრდა, ასევე, რუსეთსა და აშშ-ში ნავთობის მოპოვების მომატება.
ანგარიშის თანახმად, ნავთობზე გლობალური მოთხოვნა დღეში 2,5 მილიონი ბარელით მოიმატებს და 102,1 მილიონ ბარელს მიაღწევს.
OPEC-ის მიერ ნავთობის დღიური მოპოვება ოქტომბერში წინა თვესთან შედარებით 80,000 ბარელით გაიზარდა და მისი 13 წევრი ქვეყნის მთლიანი მოპოვება საშუალოდ 27,90 მლნ. ბარელს შეადგენდა.
ანგარიშის მიხედვით, ნედლი ნავთობის მოპოვება ძირითადად გაიზარდა ანგოლაში, ირანსა და ნიგერიაში, ხოლო წარმოება შემცირდა ლიბიაში, საუდის არაბეთსა და ქუვეითში.
ორგანიზაცია ნავთობის მწარმოებელ 13 ქვეყანას აერთიანებს: ალჟირს, ანგოლას, კონგოს რესპუბლიკას, ეკვატორულ გვინეას, გაბონს, ერაყს, ირანს, ქუვეითს, ლიბიას, ნიგერიას, საუდის არაბეთს, არაბთა გაერთიანებულ საემიროებს და ვენესუელას.
ცოტა ხნის წინ რამდენიმე არაწევრმა ქვეყანამ, მათ შორის აზერბაიჯანმა, ბაჰრეინმა, ბრუნეიმ, ყაზახეთმა, მალაიზიამ, მექსიკამ, ომანმა, სამხრეთ სუდანმა, სუდანმა და რუსეთმა, დაიწყეს ორგანიზაციის პოლიტიკაში მონაწილეობა. მათ შექმნეს ჯგუფი, რომელიც ცნობილია როგორც OPEC+. აღსანიშნავია, რომ ეს ქვეყნები კვლავ განიხილება OPEC-ის არაწევრ ქვეყნებად.
