ნორვეგიის საგარეო საქმეთა სამინისტრო რუსეთის საელჩოს 15 თანამშრომელს ქვეყნიდან აძევებს.
საგარეო უწყების განცხადებაში ნათქვამია, რომ ისინი არიან „დაზვერვის ოფიცრები, რომლებიც ჩართულნი იყვნენ იმ საქმიანობაში, რომელიც არ შეესაბამება მათ დიპლომატიურ სტატუსს”.
ნორვეგიის სამართალდამცავი უწყებები დიპლომატიურ საფარქვეშ მომუშავე რუს დაზვერვის ოფიცრებს გარკვეული დროის განმავლობაში აკვირდებოდნენ.
საგარეო უწყების განმარტებით, სახელმწიფო უსაფრთხოების მდგომარეობის გაუარესების ფონზე, მათი სასწრაფოდ გაძევება გადაწყდა.
ნორვეგიის საგარეო საქმეთა მინისტრი აცხადებს, რომ ნორვეგიის ყველაზე დიდი ჯაშუშური საფრთხე რუსეთიდან მოდის, რასაც ქვეყანა საპასუხო ზომებს დაუპირისპირებს.
უკრაინაში რუსეთის შეჭრის შემდეგ, რუსი დიპლომატები არაერთმა ქვეყანამ გააძევა, მათ შორის ესტონეთმა, ლიტვამ და ლატვიამ.
