თიბისი კაპიტალის საბაზო სცენარის თანახმად, 2024 წლის ბოლოსათვის მონეტარული პოლიტიკის განაკვეთი დაახლოებით 8%-მდე შემცირდება.
თიბისი კაპიტალი მონეტარული პოლიტიკის უფრო მეტად შერბილების რამდენიმე წინაპირობას ასახელებს.
მათ შორის ყველაზე მნიშვნელოვანი ინფლაციის დაბალი მაჩვენებელია. თებერვლის ინფლაცია მოსალოდნელზე უფრო დაბალია. ასევე, შესაძლოა ერთჯერადად, თუმცა იანვარში, გასულ პერიოდთან შედარებით, უფრო ზომიერი საკრედიტო აქტივობა დაფიქსირდა. სავალუტო შემოდინებები და ეკონომიკის ზრდის ნორმალიზება კვლავ შემცირების არგუმენტებია.
ამავდროულად, მაღალი გეოპოლიტიკური რისკების გარდა, გასათვალისწინებელია, რომ საქართველო და მსგავსი ქვეყნები ძირითადად აშშ-ს და ასევე გარკვეულწილად მაინც ევროზონაში არსებულ განაკვეთებზე არიან დამოკიდებული.
ლარსა და დოლარს შორის საპროცენტო განაკვეთების დიფერენციალი გარკვეული ლიმიტით არის შეზღუდული. ამდენად, ამერიკასა და ევროზონაში სადღეისოდ არსებული მაღალი განაკვეთები, ზოგადად განვითარებად ქვეყნებში მონეტარული პოლიტიკის შერბილების საწინააღმდეგო, მართალია ერთ-ერთი, თუმცა მაინც ანგარიშგასაწევი გარემოებაა.
ასევე საყურადღებოა დოლარში დენომინირებული საქართველოსა და აშშ-ს სამთავრობო ფასიანი ქაღალდების საპროცენტო განაკვეთებს შორის განსხვავება, რაც ქვეყნის რისკ პრემიუმად მოიაზრება.
ამ მხრივ, მნიშვნელოვანია აღინიშნოს, რომ საქართველოსათვის ევროკავშირის წევრობის კანდიდატის სტატუსის მინიჭების შემდეგ, ეს მაჩვენებელი შემცირდა, რაც ცალსახად დადებითი განვითარებაა და ლარში საპროცენტო განაკვეთების შემდგომი დაწევის რაციონალზე მიუთითებს.
წინა პროგნოზით, თიბისი კაპიტალი 2024 წლის ბოლოსათვის რეფინანსირების განაკვეთის 9%-დან 8.25%-მდე შემცირებას ვარაუდობდა.
