2024 წლის პირველი იანვრიდან საქართველოში 2013 წლამდე გამოშვებული მსუბუქი ავტომობილების იმპორტი აიკრძალება. 2025 წლის 1-ელი იანვრიდან კი ასევე აიკრძალება ავტობუსებისა და სხვა, 10 წელზე ადრე გამოშვებული სატრანსპორტო საშუალებების იმპორტი. ამის შესახებ განცხადება პრემიერ-მინისტრმა დღეს, 12 ივნისს გააკეთა.
ირაკლი ღარიბაშვილის განმარტებით, შეზღუდვის შემოღების მიზეზი ქვეყანაში ჰაერის დაბინძურების მაღალი მაჩვენებელია, რაც პირველ რიგში, გაუმართავი ავტომობილებით არის გამოწვეული.
„ჩვენ უკვე რამდენიმე წელია დავაწესეთ შეზღუდვა საწვავზე და ევრო 5-ის სტანდარტის საწვავი შემოდის საქართველოში. ამ საკითხს მუდმივ მონიტორინგს უწევს გარემოს ეროვნულის სააგენტო. წელს დიზელზეც იგივე გადაწყვეტილება მივიღეთ და უკვე ევრო 5-ის სტანდარტის დიზელი შემოდის ქვეყანაში. მაგრამ დღეს რაც გამოწვევად დარჩა, ეს არის ჰაერის დაბინძურება, რაც ძალიან ბევრი გაუმართავი ავტომობილით არის გამოწვეული…
ჩვენ ვიმსჯელეთ და გადავწყვიტეთ, რომ ქვეყანაში ავტომობილების ევრო 5-ის სტანდარტი შემოვიღოთ. ეს პრაქტიკაში ნიშნავს, რომ 2013 წლამდე გამოშვებული ავტომობილების იმპორტი შეიზღუდება. რეგულაცია მსუბუქი ავტომობილებისთვის უნდა შევიდეს ძალაში 2024 წლის პირველი იანვრიდან, ხოლო ავტობუსების და სატვირთო ავტომანქანებისთვის 2025 წლის პირველი იანვრიდან და ამაზე ჯერ კიდევ ვმსჯელობთ“, – განაცხადა ღარიბაშვილმა.
პრემიერის განმარტებით, აღნიშნული თარიღებიდან ქვეყანაში ვეღარ დარეგისტრირდება ევრო 5-ის სტანდარტზე ნაკლები ავტომობილი.
მიღებული გადაწყვეტილება არ შეეხება ქვეყანაში არსებულ სატრანსპორტო საშუალებებს. ასევე, რეექსპორტისა და ტრანზიტის მიზნით შემოყვანილ ავტომანქანებს.
