საზოგადოება და ბანკების ინფორმაციით, 2023 წლის 1-ელი აპრილისთვის ცვლად საპროცენტო განაკვეთზე მიბმული 179 600 სესხია გაცემული. მათი აბსოლუტური უმრავლესობა რეფინანსირების განაკვეთზეა მიბმული. ასეთი სესხების მოცულობა 10.688 მლნ ლარს შეადგენს.
რეფინანსირების განაკვეთის 11%-დან 10.5%-მდე შემცირების შედეგად, ამ სესხებზე გადასახდელი თანხა შესაბამისად დაიწევს.
1-ელი მარტიდან 1-ელ აპრილამდე ცვლად საპროცენტო განაკვეთში გაცემული სესხების რაოდენობა 700-ით შემცირდა, თუმცა, მთლიანი პორტფელი 10.524 მილიონიდან 10.688 მილიონ ლარამდე გაიზარდა.
78 000 სამომხმარებლო ტიპის სესხია 179 600 ხელშეკრულებიდან, მოცულობა კი – 1 740 მილიონი ლარი. ლარში გაცემული სამომხმარებლო სესხების საშუალო შეწონილმა საპროცენტო განაკვეთმა 1-ელი აპრილის მდგომარეობთ 20.55% შეადგინა.
უძრავი ქონებით უზრუნველყოფილი სესხები რაოდენობრივად მეორე ადგილზეა. რეფინანსირების განაკვეთზე 1-ელი აპრილის მონაცემებით, 73 000 სესხია მიბმული, საშუალოდ 14.53%-ში. მთლიანი პორტფელი კი 3 433 მილიონი ლარია.
ბიზნესსესხების გასაცემად 27 700 ხელშეკრულებაა გაფორმებული, რაც 1-ელ მარტთან შედარებით 100-ით მეტია. მთლიანი პორტფელი 5 477 მილიონი ლარია, საშუალოდ 14.50%-ში.
რეფინანსირების განაკვეთზე მიბმული ავტოსესხი ყველაზე მცირე რაოდენობით არის გაცემული. სულ 1-ელი აპრილის მონაცემებით, 700 ხელშეკრულებაა გაფორმებული. 23.3 მლნ ლარი ბანკებმა საშუალოდ 16.88%-ში გაასესხეს.
ასევე გაცემულია ცვლად საპროცენტო განაკვეთზე მიბმული 300 სესხი, რომელთა კონკრეტული მიზნობრიობა უცნობია. ამ სესხების მთლიანი მოცულობა 15.2 მილიონი ლარია.
1-ელი აპრილის მდგომარეობით, ცვლად საპროცენტო განაკვეთზე მიბმული სესხები ლარში გაცემული მთლიანი საკრედიტო პორტფელის 42.9%-ია. მათ შორის ყველაზე მაღალი საპროცენტო განაკვეთი სამომხმარებლო სესხზეა – 20.55%-ია, რომელსაც მოჰყვება ავტო სესხი – 16.88%-იანი განაკვეთით.
1-ელი აპრილის მდგომარეობით, გაზრდილია სასესხო პორტფელი, ხოლო ხელშეკრულებების რაოდენობა შემცირებულია. 1-ელ მარტის მონაცემებთან შედარებით, საპროცენტო განაკვეთების არსებითი ცვლილება არც ერთი მიზნობრიობით გაცემულ სესხებში არ შეიმჩნევა.
საზოგადოება და ბანკების აზრით, მონეტარული პოლიტიკის კომიტეტის დღევანდელი გადაწყვეტილება, ინფლაციის გამომწვევი შიდა და გარე ფაქტორების შესუსტებისა და ინფლაციის შემცირების ტენდენციითაა გამოწვეული.
საზოგადოება და ბანკები მიიჩნევს, რომ ეროვნულმა ბანკმა ეკონომიკურ პროცესებზე დაკვირვება უნდა გააგრძელოს და გამოიყენოს ყველა ის ინსტრუმენტი, რაც სამომავლოდ ფასების სტაბილურობასა და მაღალ ეკონომიკურ ზრდას შორის წონასწორობას უზრუნველყოფს.
