ბოლო რამდენიმე წლის განმავლობაში თბილისის შემოგარენში მიწის ნაკვეთებზე მოთხოვნა მნიშვნელოვნად გაიზარდა, რაც ძირითადად, მომხმარებლის ქცევის ცვლილებამ განაპირობა. ეს კი, თავის მხრივ, პანდემიით იყო გამოწვეული.
დედაქალაქის შემოგარენში მიწის ნაკვეთებზე მოთხოვნისა და ფასების ცვლილებების ანალიზი TBC Capital-მა ჩაატარა. ჩატარებულმა კვლევამ აჩვენა, რომ:
2023 წლის 6 თვეში, ფასების ყველაზე მაღალი დონე წყნეთში დაფიქსირდა, სადაც კვადრატული მეტრის ფასმა $228-ს მიაღწია. წყნეთის შემდეგ მიწის ნაკვეთი ყველაზე ძვირი ოქროყანასა ($177) და თხინვალაში ($110) ღირს.
2023 წლის პირველ 6 თვეში მიწის ნაკვეთის ყველაზე მეტი ტრანზაქცია დაფიქსირდა ლისზე, ხოლო შემდეგ კი – საგურამოში.
უბნების მიხედვით, სიტუაცია ასეთია:
ლისი: გაყიდული ნაკვეთების ფართობი ძირითადად 2000 კვადრატულ მეტრზე ნაკლებია. 2023 წლის იანვარ-ივნისში, მათი წილი მთლიან ტრანზაქციებში 91%-ს შეადგენდა. 2000 კვადრატულ მეტრზე ნაკლები ფართობის მქონე ნაკვეთების საშუალო ფასმა 86 $/კვ.მ შეადგინა.
ლისის ტერიტორიაზე 2022 წელს 720 ათას კვადრატულ მეტრზე მეტი მიწა გაიყიდა.
2021-2022 წლებში გაყიდვები ძირითადად კონცენტრირებული იყო 40-60 და 60-100 $/კვ.მ-ის საფასო კატეგორიაში. თუმცა, 2023 წლის პირველ ნახევარში გაყიდვების უმეტესი ნაწილი (25%) იყო 100-200 $/კვ.მ-ის საფასო დიაპაზონში.
საგურამო: 2023 წლის პირველ ნახევარში გაყიდული ნაკვეთების 55%-ის ფართობი 1000 კვ.მ-ზე ნაკლები იყო, ხოლო 1000-დან 2000 კვ.მ-მდე ფართობის ნაკვეთების წილმა 28% შეადგინა.
საშუალო გასაყიდმა ფასმა კი 2000 კვ.მ-ზე ნაკლები ფართობის ნაკვეთებისთვის 65 $/კვ.მ შეადგინა.
ამავე ტერიტორიაზე 2021 წელს გაყიდული მიწის ნაკვეთების საერთო ფართობი 72%-ით გაიზარდა და 900 ათასი კვ.მ შეადგინა.
2022 წელს ეს მაჩვენებელი 33%-ით შემცირდა, თუმცა, პანდემიამდე პერიოდთან შედარებით, კვლავ მაღალ დონეზე შენარჩუნდა.
რაც შეეხება ფასებს, ტრანზაქციების განაწილებამ ოდნავ გადაინაცვლა უფრო მაღალი ფასებისკენ.
ტაბახმელა: 2023 წლის პირველ ნახევარში გაყიდული ნაკვეთების 47%-ის ფართობი 1000 კვ.მ-ზე ნაკლები იყო, ხოლო 1000-დან 2000 კვ.მ-მდე ფართობის ნაკვეთების წილმა 43% შეადგინა. საშუალო გასაყიდი ფასი 2000 კვ.მ-ზე ნაკლები ფართობის ნაკვეთებისთვის 68 $/კვ.მ-ს გაუტოლდა.
2021 წელს ტაბახმელაში გაყიდული მიწის ნაკვეთების საერთო ფართობმა 500 ათასი კვ.მ შეადგინა, რაც წინა წლის მაჩვენებელს 30%-ით აღემატებოდა.
2022 წელს ეს მაჩვენებელი კვლავ მაღალ დონეზე შენარჩუნდა და 485 ათას კვ.მ-ს გაუტოლდა. გაყიდვები ძირითადად კონცენტრირებული იყო 20-40 (23%) და 100-200 (21%) $/კვ.მ-ის საფასო კატეგორიაში.
წყნეთი: გაყიდული ნაკვეთების ფართობი ძირითადად 2000 კვადრატულ მეტრზე ნაკლებია.
2023 წლის 6 თვეში, მათი წილი მთლიან ტრანზაქციებში 95%-ს შეადგენდა. 2000 კვ.მ-ზე ნაკლები ნაკვეთების საშუალო გასაყიდი ფასი 220 $/კვ.მ-ს აღემატებოდა.
2022 წელს წყნეთში გაყიდული მიწის ნაკვეთების საერთო ფართობმა პერიოდის მაქსიმალურ მაჩვენებელს (180 ათასი კვ.მ) მიაღწია.
წყნეთში მიწის ნაკვეთის საშუალო ფასი, სხვა შემოგარენებთან შედარებით, ყველაზე მაღალია. 2023 წელს ყველაზე მეტი ნაკვეთი 200-500 $/კვ.მ-ის ფარგლებში გაიყიდა.
კოჯორი: 2023 წლის პირველ ნახევარში კოჯორში გაყიდული ნაკვეთების 67%-ის ფართობი 1000 კვ.მ-ზე ნაკლები იყო, ხოლო 1000-დან 2000 კვ.მ-მდე ფართობის ნაკვეთების წილმა 31% შეადგინა.
საშუალო გასაყიდი ფასი კი 2000 კვ.მ-ზე ნაკლები ფართობის ნაკვეთებისთვის 71 $/კვ.მ იყო.
კოჯორში 2021 წელს გაყიდული მიწის ნაკვეთების საერთო ფართობი 276 ათას კვ.მ-მდე გაიზარდა, რაც წინა წელთან შედარებით, 41%-ით მეტი იყო.
2022 წელს ეს მაჩვენებელი 25%-ით შემცირდა, თუმცა პანდემიამდე პერიოდთან შედარებით კვლავ მაღალ დონეზე შენარჩუნდა.
წავკისი: 2023 წლის 6 თვეში გაყიდული ნაკვეთების 57%-ის ფართობი 1000 კვ.მ-ზე ნაკლები იყო, ხოლო 1000-დან 2000 კვ.მ-მდე ფართობის ნაკვეთების წილმა 35% შეადგინა.
2000 კვ.მ-ზე ნაკლები ფართობის ნაკვეთებისთვის საშუალო გასაყიდი ფასი 102 $/კვ.მ-ს გაუტოლდა, რაც 31%-ით აღემატება წინა წლის იმავე პერიოდის მაჩვენებელს.
წავკისში 2021 წელს გაყიდული მიწის ნაკვეთების საერთო ფართობი გაიზარდა 297 ათას კვ.მ-მდე. 2022 წელს ეს მაჩვენებელი 24%-ით შემცირდა. რაც შეეხება ფასს, გაყიდვები ძირითადად კონცენტრირებული იყო 60-100 და 100-200 $/კვ.მ-ის საფასო კატეგორიაში.
საერთო ჯამში, 2021 წელს თბილისის შემოგარენში მიწის გაყიდვების 39%-იანი ზრდა დაფიქსირდა.