სახელმწიფო პროგრამით დაფინანსებულ იშვიათი დაავადებების სიას უკვე აქონდროპლაზიის დიაგნოზი დაემატა. „2023 წლის ჯანმრთელობის დაცვის სახელმწიფო პროგრამების დამტკიცების შესახებ“ მთავრობის დადგენილებაში ცვლილება უკვე შევიდა.
აქონდროპლაზიის დიაგნოზის მქონე ერთ-ერთი ბავშვის მშობელი მაკუნა გოჩიაშვილი ფეისბუქზე წერს:
„პრემიერმა ხელი მოაწერა განკარგულებას, რომ აქონდროპლაზიის მქონე ადამიანებზე სახელმწიფო იღებს პასუხისმგებლობას პროტოკოლით გათვალისწინებული მკურნალობის უზრუნველყოფაზე. ეს გულისხმობს წამლის გარდა სხვა, ყველა საჭირო პროცედურასა თუ თერაპიას. აქამდე აქონდროპლაზია არ შედიოდა ამ სიაში სხვა იშვიათი დაავადებებისგან განსხვავებით.
წამალი დაიდება, როცა პროტოკოლი დასრულდება მაისის ბოლოს და შემდეგ ოფიციალურად დამტკიცდება რამდენიმე დღეში.
პროტოკოლის ჩონჩხი კი მზად აქვთ და წინა საბჭოზე გავეცანით. მის საბოლოო ვერსიას უკვე შემდეგ საბჭოზე გავეცნობით და დაგააფდეითებთ, რამდენად მისაღები იქნება ჩვენთვის.
იქიდან გამომდინარე, რაც შიდა საუბრებში ჟღერდება, არ გვაქვს იმის საფუძველი, ვიეჭვოთ, რომ პროტოკოლში ვოსორიტიდს არ გაითვალისწინებენ.“
