რა არის ლარის კურსში უკვე ასახული?
თიბისი კაპიტალის მთავარი ეკონომისტის შეფასებით, თიბისის არხებით დანახარჯები, გასულ წელთან შედარებით ასევე მაღალ აქტივობაზე მიუთითებს. მაგალითად, მაისში მიგრაციის ეფექტის გარეშე, ტრადიციული ტურიზმის შემოსავლების ზრდა აშშ დოლარში დაახლოებით 47%-საც კი შეადგენს. ასევე ზრდაა აპრილთან შედარებითაც, თუმცა თუ სეზონურ ფაქტორებს გამოვრიცხავთ, უფრო კლება ფიქსირდება.
ყოველდღიურ მონაცემებზე დაყრდნობით კი, შეიძლება ითქვას, რომ ბოლო პერიოდში, ისევ და ისევ, სეზონური ფაქტორების, ანუ იმის გამორიცხვით, რომ ზაფხული აქტიური სეზონია, ტურისტული შემოდინებები დაახლოებით ერთსა და იმავე დონეზეა, თუმცა, გასულ თვეებში ზრდის გამო, მაღალი ბაზის გათვალისწინებით.
ლარის ვალუტაში კონვერტაციების მნიშვნელოვანი ნაწილი სავალუტო შემოდინებებით კომპენსირდება
მთავარი ეკონომისტის შეფასებით, სავალუტო შემოდინებები ლარის კურსისათვის ნეგატიურ სურათს არ აჩვენებს. უფრო კონკრეტულად, უფრო ნეიტრალური ან პოზიტიურიც კი არის. პოზიტიურად უფრო იმ შემთხვევაში შეიძლება მივიჩნიოთ, თუ ე.წ. კონვერტაციებს ცალკე გამოვყოფთ.
კერძოდ, სებ-ს მიერ გამოქვეყნებული მონაცემებზე დაყრდნობით, მაისში, დაახლოებით $400 მილიონის ექვივალენტი დეპოზიტი ლარიდან ვალუტაში გადახურდავდა, რის გამოც უცხოური ვალუტის დეპოზიტების მატება ბოლო წლების ერთ-ერთ ყველაზე მაღალ ნიშნულზეა. შესაბამისად შემცირდა ლარის დეპოზიტების ზრდა, ხოლო ჯამურად დინამიკა გასული თვეების მსგავსია.
რაც შეეხება სესხებს, მაისის საკრედიტო აქტივობის დინამიკა ჯერჯერობით არაა ხელმისაწვდომი, თუმცა, მსგავს პერიოდებს ლარის სესხების შედარებით მეტი მატება ახასიათებს. ამდენად, უკვე აღნიშნული, საქართველოს ეკონომიკისა და სავალუტო ბაზრის ზომის გათვალისწინებით, საკმაოდ დიდი ზეწოლაა.
ამასთან, ჩვენი შეფასებით, ამავე პერიოდში სებ-ის ინტერვენციებმა დაახლოებით $130 მილიონი ან მცირედით მეტი შეადგინა. შესაბამისად, ლარის გაუფასურების გათვალისწინებითაც, კონვერტაციების მნიშვნელოვანი ნაწილი სავალუტო შემოდინებებით კომპენსირდება.
ამ მხრივ, გასათვალისწინებელია, რომ სენტიმენტებით გამოწვეული გაუფასურების ზეწოლა, ისტორიულად, ხშირად იცვლება და შემდგომ უკვე გამყარების მიმართულებით მოქმედებს. ბუნებრივია, ეს არ ნიშნავს, რომ ვალუტის დეპოზიტების მიმართულებით კონვერტაციები დამატებით არ გაგრძელდება, თუმცა მაინც პროგნოზების კუთხით, აღნიშნული მნიშვნელოვანი გასათვალისწინებელი ფაქტორია.
რა შეიძლება ითქვას ლარის სეზონურობის შესახებ და რატომ არის ეს ფაქტორი მნიშვნელოვანი?
საქართველოში წმინდა სავალუტო შემოდინებები მართლაც სეზონურია, რაც ბოლო წლებში ლარის სეზონურობაშიც გამოიხატა. თუმცა, მას შემდეგ რაც სეზონურობა ბაზრის მონაწილეების მოლოდინებშიც აისახა, მიუხედავად იმისა რომ წმინდა სავალუტო შემოდინებები კვლავ სეზონური დარჩა, თავად ლარის სეზონურობამ მნიშვნელოვნად იკლო. ანუ, დაახლოებით ზაფხულის მოახლოებამდე, ადგილი ჰქონდა დეპოზიტების მეტ ლარიზაციას და დაახლოებით ზამთრის მოახლოებამდე, უკვე პირიქით.
ამ კუთხით, ცალსახაა, რომ ვალუტის მიმართულებით გადახურდავებები ბევრად უფრო ადრე მოხდა, რაც ასევე ლარის სამომავლო გაუფასურების წინააღმდეგ ერთგვარ ბუფერად შეიძლება ჩაითვალოს.
და რა შეიძლება ითქვას არჩევნების კუთხით?
ლოგიკა დიდწილად იგივეა. კერძოდ, თუ მოლოდინებია, რომ ლარი არჩევნების შემდგომ მნიშვნელოვნად გაუფასურდება, მაშინ ეს ლარის ფასში უკვე არჩევნებამდე იქნება ასახული, რაც სეზონურობის მსგავსად, ბოლო საარჩევნო ციკლის დამახასიათებელი ტენდენცია იყო.
შეჯამების სახით შეიძლება ითქვას, რომ თიბისი კაპიტალის ლარის კურსის პროგნოზის თანახმად, წმინდა სავალუტო შემოდინებები, ლარისათვის პოზიტიურია, თუმცა სენტიმენტები კურსის მნიშვნელოვან მერყეობას იწვევს.
საქართველოს ძირითადი სავაჭრო-ეკონომიკური პარტნიორების ვალუტებთან მიმართებით ლარის საშუალო შეწონილი გაცვლითი კურსის კუთხით შეფასება დიდწილად ნეიტრალურია, ხოლო ინფლაციის მხრივ, შეფასება ნეიტრალური ან პოზიტიურია.
რას გულისხმობს ამ შემთხვევაში პოზიტიური? მართალია წლიური ინფლაცია ჯერ კიდევ სამიზნეზე დაბლაა, თუმცა გაწლიურებული ყოველთვიური მაჩვენებლები უკვე 3%-ზე მაღალია და ლარის გაუფასურების შემთხვევაში, თავისთავად, ინფლაცია კიდევ მოიმატებს.
ამდენად, მოცემული ჩარჩოს 3 ფაქტორის გათვალისწინებით, მთავარი ეკონომისტის შეფასება დიდწილად ნეიტრალურია, განსხვავებით ადრინდელი საბაზო სცენარისა, სადაც ლარის მცირედით, მაგრამ სწორედ გაუფასურება მოიაზრებოდა.