TBC Capital-ის მთავარი ეკონომისტი კვირის მიმოხილვაში იმ ფაქტორებს ასახელებს, რომლებიც რეფინანსირების განაკვეთზე მოახდენენ გავლენას.
მისი შეფასებით, მიმდინარე წლის ბოლომდე ეროვნული ბანკი მონეტარული პოლიტიკის განაკვეთს შეამცირებს, მაგრამ გაიზარდა ალბათობა, რომ ის ნაკლებად შერბილდება. ხოლო მომდევნო წელს განაკვეთი ადრე პროგნოზირებული 8%-ის ნაცვლად, 8.25%-ის ნიშნულზე იქნება.
მთავარი ეკონომისტის კვირის შეფასება:
• სექტემბრის ინფლაციის მაჩვენებლები ჩვენს მოლოდინებთან დიდწილად შესაბამისი იყო.
• საყურადღებოა ბოლო პერიოდში ნავთობის ფასების უკვე დაღმავალი ტენდენცია, თუმცა, ისრაელში განვითარებული მოვლენები ნავთობის ფასების ზრდის ფაქტორია.
• სავალუტო შემოდინებების კუთხით, ისრაელი საქართველოს მნიშვნელოვანი ეკონომიკური პარტნიორია, თუმცა ხვედრითი წილი უფრო ზომიერია.
• მთლიანობაში, ვინარჩუნებთ შეფასებას სავალუტო შემოდინებების უფრო ნორმალიზების, ვიდრე გაუარესების კუთხით.
• დეპოზიტების ვალუტების მიხედვით ყოველდღიურ დინამიკაში, რაც ხშირად ე.წ. სენტიმენტების საკმაოდ მნიშვნელოვანი საზომია, გაუარესება არ იკვეთება.
• სებ-ის თანახმად, გასულ კვირაში აშშ დოლარის გაყიდვის მიმართულებით თითქმის 50-მილიონიანი ინტერვენცია ერთჯერად გარემოებებს უკავშირდებოდა.
• აშშ-ის 10-წლიან სახაზინო ვალდებულებებზე გაზრდილი საპროცენტო განაკვეთი და დოლარის განაკვეთების მაღალ დონეზე ხანგრძლივად შენარჩუნების მოლოდინი საქართველოს მსგავს ქვეყნებში ინვესტიციების კუთხით ანგარიშგასაწევი პარამეტრია.
• შესაბამისად, საბაზო სცენარი მცირედით დაკორექტირდა: მიმდინარე წლის ბოლომდე მონეტარული პოლიტიკის განაკვეთის 10%-დან 9.5%-მდე შემცირება კვლავ რეალისტურია, თუმცა ნაკლებად შემცირების მეტი ალბათობით, 2024 წელს კი, 8%-იანი საბაზო სცენარი 0.25%-ით იზრდება და 8.25%-ს შეადგენს.
