Galt&Taggart-ის მიერ ჩატარებული კვლევის მიხედვით, 2023 წლის სექტემბერში თბილისში 3,314 ბინა გაიყიდა, რაც წლიურად 21.5% და თვიურად 6.7%-იანი კლებაა.
წლიური კლების ძირითადი მიზეზი წინა წლის რეკორდულად მაღალი მაჩვენებელი, ანუ მაღალი ბაზაა.
სექტემბერში, წინა თვეების მსგავსად, ყველაზე მცირე კლება პირველადი ბაზრის (დეველოპერების) ბინების გაყიდვებმა აჩვენა (-8.2% წ/წ).
ამასთან, მეორად ბაზარზე ახალი და ძველი პროექტების გაყიდვები წლიურად 29%-ით შემცირდა.
კვლევაში აღნიშნულია, რომ მეორად ბაზარზე გაყიდვების მნიშვნელოვანი კლება ქირის ბაზრის მიმზიდველობის შემცირებაზე მიუთითებს.
2023 წლის სექტემბერში დიდი დიღმის (+6.9% წ/წ) და ჩუღურეთის (+16.1% წ/წ) გარდა, გაყიდვები ყველა უბანში შემცირდა.
ამასთან, ეს შემცირება ყველაზე მძაფრი ცენტრალურ რაიონებში იყო (-32.4% წ/წ), ხოლო ფართო ცენტრსა და გარეუბნებში შედარებით მცირე კლება დაფიქსირდა, შესაბამისად, -20.4% წ/წ და -7.6% წ/წ.
ბაზრის სხვა ძირითადი მახასიათებლები უცვლელი დარჩა – გაყიდვებში საშუალო ზომის ბინების (51-80 მ2 ) მუდმივი დომინირება და საშუალო/მაღალი კლასის სეგმენტების ($801 – 1,800) წილის ზრდა, რაც გამოწვეულია მზარდი ფასებით.
უძრავი ქონების ბაზრის ზომა, მლნ აშშ დოლარი
ბინის ფასები
2023 წლის სექტემბერში პირველადი ბაზრის ფასების ზრდა გაგრძელდა. ამასთან, მეორადი ბაზრის ახალი პროექტების ფასები წინა თვეებში კლების შემდეგ სექტემბერში ისევ გაიზარდა.
უძრავი ქონების საშუალო შეწონილი ფასები, აშშ დოლარი/მ2
მნიშვნელოვანია, რომ დეველოპერების (პირველადი ბაზარი) საშუალო ფასების ყველაზე მაღალი წლიური ზრდა დაფიქსირდა დიდუბეში (+42% წ/წ), რაც გამოწვეულია პრემიუმკლასის პროექტების რაოდენობის ზრდით ამ უბანში.
საერთო ჯამში 2023 წლის სექტემბერში თბილისში $235.7 მილიონის ღირებულების ბინა გაიყიდა, რაც წლიურად 2.1%-იანი კლებაა.
ისევე როგორც წინა თვეებში, პირველადი ბაზრის ზომა გაიზარდა (+17.4% წ/წ), რამაც ნაწილობრივ დააბალანსა მეორადი ბაზრის ზომის შემცირება (-13.9% წ/წ).
