ჯანდაცვის სამინისტრო ფარმაცევტულ კომპანიებისთვის ახალ რეგულაციებს დაუწესებს, იმისთვის, რომ მათ ფასების შეთანხმებულად არ გაზარდონ და ბაზარზე დეფიციტები არ შეიქმნას. ამის შესახებ ჯანდაცვის მინისტრის მოადგილემ ილია ღუდუშაურმა გადაცემა ბიზნესპარტნიორში განაცხადა.
„მთავრობა უკვე დაგვეთანხმა ფარმაცევტულ კომპანიებთან მიმართებაში რეგულაციების გამკაცრებაზე. ამ ეტაპზე ვმუშაობთ კონკრეტულ მეთოდოლოგიაზე, რომელსაც ძალიან მალე წარმოვადგენთ. ბაზარს ვიცნობთ, ამიტომ რისკებთან დაკავშირებით მომზადებულები ვიყავით, რაღაც საკითხებზე ნამუშევარი გვაქვს და ძალიან მოკლე ვადებში შევძლებთ გავამკაცროთ რეგულაციები. შევძლებთ, იმ ქმედებებზე, რომლებსაც შეგვიძლია ვუწოდოთ არაკეთილსინდისიერი, ძალიან მკაცრი რეაგირება გვქონდეს და შევაკავოთ ფასების მატება, რომელიც არის აბსოლუტურად ხელოვნური და გაუმართლებელი,“ – განაცხადა ილია ღუდუშაურმა.
მისივე თქმით, რადგან მედიკამენტები საქართველოში ბევრ კომპანიას არ შემოაქვს, ბაზარზე ხშირად დეფიციტი იქმნება.
როგორც ცნობილია, რეფერენტული ფასების დაწესების შემდეგ, საქართველოში მედიკამენტების ნაწილი მკვეთრად გაძვირდა. ფასებმა განსაკუთრებით მოიმატა თურქული წარმოების მედიკამენტებზე. გაძვირდა სხვა მედიკამენტებიც, რომლებიც, პირველ ეტაპზე, რეფერენტულ პოლიტიკაში არ მოხვდა. ფარმაცევტულმა ბიზნესმა ფასების მომატება თურქეთში მედიკამენტებზე ფასების ზრდით ახსნა, რასაც ჯანდაცვის სამინისტრო არ ეთანხმება. უწყებამ ფარმაცევტული კომპანიები გარიგებაში დაადანაშაულა და რეგულაციებისა და კონტროლის კიდევ უფრო გამკაცრების გადაწყვეტილება მიიღო.
მინისტრის მოადგილის თქმით, ბაზარზე მოქმედებს სამი ჰოლდინგი, რომელსაც საკუთარი წარმოების გარდა, იმპორტს და საცალო დისტრიბუციას ახორციელებენ. ასევე, ფლობენ ჰოსპიტლებს. ზოგიერთ მათგანს აქვს სადაზღვევო კომპანიებიც. პარალელურად, ფარმაცევტული ბაზრის შესწავლა დაიწყო კონკურენციის სააგენტომაც.
