საქართველოს მთავრობა ხორბლის ექსპორტის აკრძალვას აუქმებს.
სოფლის მეურნეობის მინისტრის – ოთარ შამუგიას ინფორმაციით, ხვალიდან მთავრობის განკარგულებით, ხორბლის ექსპორტის შეზღუდვა მოიხსნება. მისი თქმით, მთავრობამ გადაწყვეტილება ფერმერების ხორბლის რეალიზებაში დახმარების მიზნით მიიღო.
როგორც ცნობილია, ქვეყანაში წისქვილკომბინატების გაჩერების გამო, ფერმერებს არსებული მარცვლეულის მოსავლის გაყიდვის პრობლემა შეექმნათ. ამასთან, ქვეყანაში იმპორტირებული ფქვილის დიდი მარაგიც დაგროვდა. ხორბლის რეალიზაციას ექსპორტზე დაწესებული აკრძალვაც უშლიდა ხელს.
„რადგან სასურსათო უსაფრთხოების რისკი ქვეყანაში აღარ დგას. ქვეყანაში ხორბლის და ფქვილის 2-3 თვის მარაგი არსებობს და 3 თვეში ახალ მოსავალსაც ველით. აქედან გამომდინარე, მივიღეთ გადაწყვეტილება ხორბლის ექსპორტის აკრძალვა ვადაზე ადრე მოვხსნა“, – განაცხადა სოფლის მეურნეობის მინისტრმა.
მთავრობამ ხორბლისა და ქერის ექსპორტის აკრძალვის გადაწყვეტილება შარშან, სასურსათო უსაფრთხოების რისკებიდან გამომდინარე მიიღო. აკრძალვა ივლისამდე შემოიღეს, მაგრამ ის დროზე ადრე გაუქმდება. ქერის ექსპორტზე აკრძალვა მთავრობამ გასულ წელსვე მოხსნა.
