კახოვსკის ჰიდროელექტროსადგურის კაშხლის განადგურების გამო უკვე დაიტბორა რვა დასახლება დნეპრის მარჯვენა სანაპიროზე, რომელსაც უკრაინული ძალები აკონტროლებენ.
რუსების მიერ ოკუპირებულ ნოვაია კახოვკაში ნაწილობრივ ჩამოინგრა კახოვკის ჰიდროელექტროსადგურის კაშხალი. შედეგად, მდინარე დნეპრში წყლის დონე იმატებს. ხერსონის ოლქში ევაკუაცია მიმდინარეობს.
ამჟამად წყალი კაშხლის დანგრეული ნაწილის გავლით მიედინება.
რუსეთის ფედერაციის მიერ დანიშნულმა ნოვაია კახოვკას „მერმა“ ჯერ უარყო აფეთქება, მაგრამ მოგვიანებით გაავრცელა ინფორმაცია, რომ კაშხალი უკრაინელების დაბომბვის შედეგად დაზიანდა, თუმცა გადარჩა.
მისივე თქმით, კაშხლის დანგრევის შემდეგ წყლის დონე 2,5 მეტრით გაიზარდა და ყირიმისთვის წყლის მიწოდების პრობლემა შეიქმნა.
ხერსონის რეგიონული სამხედრო ადმინისტრაციის ხელმძღვანელი აცხადებს, რომ წყალი კრიტიკულ დონეს ხუთ საათში მიაღწევს.
დატბორვის საფრთხის ქვეშ ათობით დასახლებული პუნქტია. საუბარია 80 დასახლების შესაძლო დატბორვაზე.
უკრაინის მიერ კონტროლირებად ხერსონის ოლქის იმ უბნებიდან, სადაც წყალდიდობაა, მოსახლეობის ევაკუაცია უკვე დაწყებულია. ადგილობრივი ხელისუფლების ცნობით, დნეპრის მარჯვენა სანაპიროზე წყალდიდობის ზონებში მთლიანობაში დაახლოებით 16 ათასი ადამიანი იმყოფება.
ატომური ენერგიის საერთაშორისო სააგენტო (IAEA) აცხადებს, რომ ზაპორიჟიეს ატომურ ელექტროსადგურს უშუალო საფრთხე ჯერჯერობით არ ემუქრება, კახოვკის ჰიდროელექტროსადგურის კაშხლის ჩამონგრევის გამო.
„სააგენტოს ექსპერტები, რომლებიც ატომურ ელექტროსადგურზე იმყოფებიან, ყურადღებით აკვირდებიან სიტუაციას,“ – ნათქვამია სააგენტოს მოხსენებაში.
უკრაინამ მომხდარს ეკოლოგიური გენოციდი უწოდა. პრეზიდენტის ადმინისტრაცია მიიჩნევს, რომ ჰესის განადგურება საფრთხეს უქმნის ყირიმსა და ზაპოროჟიეს ატომურ ელექტროსადგურს.
უკრაინულ ენერგოატომში აცხადებენ, რომ კახოვკის წყალსაცავში წყლის დონის სწრაფი ვარდნა საფრთხეს უქმნის ზაპოროჟიეს ატომურ ელექტროსადგურს, რადგან წყალი აუცილებელია გაგრილების სისტემების მუშაობისთვის. ჯერჯერობით წყლის დონე აუზში 16,6 მეტრია, რაც გაგრილების სისტემისთვის საკმარისია, მაგრამ სიტუაცია შეიძლება სწრაფად შეიცვალოს.
უკრაინის პრეზიდენტმა ვოლოდიმირ ზელენსკიმ უკრაინის ეროვნული უსაფრთხოებისა და თავდაცვის საბჭოს სხდომა მოიწვია.
„რუსი ტერორისტები, კახოვკის ჰიდროელექტროსადგურის კაშხლის განადგურებით, მხოლოდ უდასტურებენ მთელ მსოფლიოს, რომ ისინი უნდა განდევნონ უკრაინის მიწის ყველა კუთხიდან. მათ არც ერთი მეტრი არ უნდა დარჩეთ, რადგან ყველა მეტრს ტერორისთვის იყენებენ. მხოლოდ უკრაინის გამარჯვება დააბრუნებს უსაფრთხოებას. და ეს გამარჯვება მოვა. ვერც წყალი, ვერც რაკეტები და ვერც სხვა ვერაფერი შეაჩერებს ტერორისტებს უკრაინაში“, – განაცხადა უკრაინის პრეზიდენტმა.
უკრაინის პრეზიდენტის აპარატის მრჩეველმა მიხაილ პოდოლიაკმა განაცხადა, რომ უკრაინის დაზვერვის თანახმად, კახოვკის ჰიდროელექტროსადგური რუსეთის 205-ე მოტორიზებულმა ბრიგადამ ააფეთქა.
