ჩეხმა წყვილმა ჯირიმ და ონდრეიმ ქორწილში ოქროს ბეჭდების ნაცვლად ჭკვიანი ბეჭდები გაცვალეს.
სმარტბეჭედს სმარტსაათის მსგავსი ფუნქციები აქვს. ბეჭდის მეშვეობით მის მფლობელს შეუძლია, აკონტროლოს გულისცემა და განახორციელოს უკონტაქტო გადახდები.
ჭკვიან ბეჭდებზე მოთხოვნა სწრაფად იზრდება მსოფლიოში და მისი გაყიდვები ყოველწლიურად 21%-ით მატულობს. თუმცა, ჯირის და ონდრეის ჭკვიანი ბეჭდები, სხვა სმარტბეჭდებთან შედარებით, უფრო „რომანტიკულია“ – ბეჭდების საშუალებით, მათ შეუძლიათ თვალი ადევნონ და იგრძნონ ერთმანეთის გულისცემა. ბეჭედი Bluetooth-ით უკავშირდება App-ს სმარტფონში და ამის შემდეგ ისინი ერთმანეთს აპლიკაციის საშუალებით უკავშირდებიან. თითის დაწოლით, საქორწილო ბეჭედზე ჩნდება მოძრავი წითელი ხაზი, რომელიც შეყვარებულის გულისცემას აჩვენებს.
ბეჭედი, სახელწოდებით HB Ring, ჩეხური ფირმა The Touch-ის მიერ არის დამზადებული. მისი გაყიდვები, შეზღუდული რაოდენობით, ჯერ კიდევ 2016 წელს დაიწყო.
ფირმამ წელს გამოუშვა ახალი პროდუქტი The Touch Locket – გულსაკიდი ყელსაბამისთვის, ჭკვიანი ბეჭდის ანალოგიური ტექნოლოგიით.
ამ ნივთების სამიზნე მომხმარებლები არიან წყვილები, რომლებსაც სურთ, გრძნობდნენ საყვარელი ადამიანის გულისცემას ან არ უნდათ ტრადიციული საქორწილო ბეჭდების ტარება.
