ირაკლი ღარიბაშვილმა მთავრობის დღევანდელ სხდომაზე ბლექ სი არენაზე დაგეგმილი კონცერტების შესახებ ისაუბრა. მისი თქმით, კონცერტები ქვეყნის პოპულარიზაციიას გაზრდის, შემოსავლის სახით კი 100 მილიონ ლარზე მეტს მოიტანს.
ირაკლი ღარიბაშვილს არ დაუკონკრეტებია, ზუსტად რა დაუჯდება ბიუჯეტს კონცერტების გამართვა.
„წელს, რომ იტყვიან, ბუმი იქნება მაღალი დონის შემსრულებლების, არტისტების, მათი კონცერტები გაიმართება. აქვე მინდა განმარტების სახით გითხრათ, რომ საუბარი იყოს იმაზე, თითქოს 70 მილიონი ლარი იხარჯება ამ კონცერტებში, რა თქმა უნდა, ეს შეიძლება იყოს ბიუჯეტი, მაგრამ აქედან ჩვენ შემოსავალს ველოდებით, როგორც პირდაპირ, ასევე, არაპირდაპირ შემოსავალს. შეიძლება იყოს მინიმუმ 100 მილიონ ლარზე საუბარი, ამას ემატება ქვეყნის ცნობადობის ამაღლება, ზოგადად პრესტიჟი და ასე შემდეგ”, – თქვა პრემიერ-მინისტრმა.
კონცერტები ბლექ სი არენას ახალი კამპანიის – სტარინგ ჯორჯიას სახელით ჩატარდება. კონცერტების სერია 5 აგვისტოს, შეკვეთილში, ბლექ სი არენაზე, ნაილ როჯერსისა და მისი ბენდის კონცერტით გაიხსნება.
31 აგვისტოს კი თბილისში Imagine Dragons იმღერებს.
როგორც ცნობილია, 2 წლის განმავლობაში, 3 სხვადასხვა ლოკაციაზე, სულ, 6 კონცერტი უნდა გაიმართოს. ღონისძიებები სახელმწიფო სუბსიდიით ფინანსდება.
