ჯანდაცვის სამინისტროს ინფორმაციით, საქართველოს მოქალაქეების საზღვარგარეთ დასაქმების მიზნით (ცირკულარული შრომითი მიგრაციის შესაძლებლობების გამოვლენის მიზნით), დიალოგი მიმდინარეობს ევროკავშირის შემდეგ ქვეყნებთან: ირლანდია, ჩეხეთი, ხორვატია, ავსტრია, უნგრეთი, სლოვენია, ესპანეთი, პორტუგალია და კვიპროსი.
ამ დრომდე საქართველოს მოქალაქეების ლეგალურად დასაქმება მხოლოდ ორ ქვეყანაში – გერმანიასა და ისრაელში განხორციელდა.
2023 წლის პირველ ოთხ თვეში გერმანიაში, სოფლის მეურნეობის სექტორში, სეზონურ სამუშაოებზე საქართველოს 216 მოქალაქე დასაქმდა. ჯანდაცვის სამინისტროს პარლამენტში წარდგენილ ანგარიშში ეს მონაცემი აქვს მითითებული.
ხოლო 2022 წელს გერმანიაში დასაქმდა საქართველოს 1 231 მოქალაქე.
ჯანდაცვის სამინისტროს ანგარიშში მითითებულია, რომ ისრაელში 2022 წლის 1-ელი ივნისიდან 2023 წლის 1-ელ მაისამდე ლეგალურად 20 ადამიანი არის დასაქმებული. ასეთი დაბალი მაჩვენებელი ძირითადად განაპირობა დასაქმების მსურველების მოთხოვნილ კრიტერიუმებთან შეუსაბამობამ. ისრაელი საქართველოს მოქალაქეებს დასაქმებას 1 წლით, მოვლის დაწესებულებებში, დამხმარე მუშაკის პოზიციაზე სთავაზობს.
წინასწარი შეთანხმებით, 2021 წელს ისრაელში საქართველოს 1 000 მოქალაქის ლეგალურად დასაქმება იყო დაგეგმილი. თუმცა, კრიტერიუმების დაუკმაყოფილებლობის გამო, ეს ვერ მოხერხდა.
გერმანიაში, სადაც დასაქმება შესაძლებელია სეზონურ სამუშაოებზე სოფლის მეურნეობის სექტორში 1-დან 3 თვემდე, წლიური კვოტა 5 000 ადამიანისთვის არის გათვალისწინებული.
ცნობისთვის, ამ შეთანხმების ფარგლებში, 2021 წელს გერმანიაში სამუშაოდ წასული მოქალაქეების ნაწილს მძიმე სამუშაო პირობებისა და დაბალი ანაზღაურების გამო პრობლემები შეექმნა. მათ გერმანელ დამსაქმებელს უჩივლეს და სასამართლოში დავა მოუგეს. სეზონურ სამუშაოზე დასაქმებულთა ნაწილმა დასაქმების სააგენტოსაც უჩივლა.
