ჯორჯ სოროსმა უარყო ჭორები მისი გარდაცვალების შესახებ. მილიარდერმა Twitter-ზე დაწერა, რომ ცოცხალია და კარგად არის.
„ჭორები იმის შესახებ, რომ გულის შეტევა მქონდა, მცდარია. ცოცხალი ვარ და კარგად ვარ“, – წერს მილიარდერი.
სოროსის პროფილს არ აქვს „ლურჯი გამშვები ნიშანი“, რომელიც ანგარიშის ავთენტურობაზე მიუთითებს, მაგრამ ამ კონკრეტული ანგარიშის ბმული სოციალურ ქსელში მილიარდერის ოფიციალურ ვებგვერდზეა.
მისი გარდაცვალების შესახებ ინფორმაცია სოციალურ ქსელში 15 მაისს გავრცელდა. ამტკიცებდნენ, რომ ის გულის შეტევით გარდაიცვალა. ეს სოროსის სიკვდილის შესახებ ინფორმაციის გავრცელების პირველი შემთხვევა არ არის. გამავრცელებლებმა, ამჯერადაც, საკუთარ სოციალურ გვერდებზე მილიონებით მნახველი მოიზიდეს.
პირველად სოროსის გარდაცვალების შესახებ ინფორმაცია Politics For All Ireland-ის Twitter-ის გვერდზე გამოჩნდა, რომელსაც სულ სამი მიმდევარი ჰყავდა. შემდეგ შეტყობინება სხვა მომხმარებლებმაც გაავრცელეს.
ჯორჯ სოროსი 92 წლისაა. ის 1930 წელს ბუდაპეშტში, ებრაულ ოჯახში დაიბადა. მან ყალბი დოკუმენტებით თავი დააღწია ნაცისტების დევნას. 1947 წელს სოროსი ლონდონის ეკონომიკის სკოლაში გაემგზავრა სასწავლებლად. დიდი ბრიტანეთიდან ის 1956 წელს ემიგრაციაში წავიდა აშშ-ში, სადაც Wall Street-ზე დაიწყო მუშაობა და 1973 წელს საკუთარი ჰეჯ-ფონდი Quantum დააარსა.
სოროსი მსოფლიოს უმდიდრესი ადამიანების სიაში 373-ე ადგილზეა. Forbes-ის რეიტინგის მიხედვით, მისი ქონება $6,7 მილიარდად არის შეფასებული.
სოროსმა თავისი ქონების უმეტესი ნაწილი მის მიერ შექმნილ ღია საზოგადოების ფონდს შესწირა, რომელიც აფინანსებს პროგრამებს განათლების, კულტურის, ხელოვნებისა და ჯანდაცვის სფეროში.
