რუსეთის წინააღმდეგ ევროკავშირის სანქციების მე-11 პაკეტი მალე ძალაში შევა.
ევროკავშირი სანქციებს დააწესებს მესამე ქვეყნების საქონლის ექსპორტზე, რომელიც რუსეთისთვის მისაწოდებლად არის განკუთვნილი.
ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირმა რუსეთიდან იმპორტი თითქმის ⅔-ით უკვე შეამცირა.
კიევში ვიზიტისას ევროკომისიის პრეზიდენტმა აღნიშნა, რომ ევროკავშირი აგრძელებს მაქსიმალურ მცდელობას, რათა გაანადგუროს პუტინის სამხედრო მანქანა და რუსეთის შემოსავალი.
„ეს პაკეტი ორიენტირებულია სანქციების გვერდის ავლით ვაჭრობის წინააღმდეგ ბრძოლაზე… კერძოდ, ვაუმჯობესებთ არსებულ ინსტრუმენტებს და ვამატებთ აკრძალულ პროდუქტებსა და საქონელს, მათ შორის თვითმფრინავების ნაწილებს, რომლებიც მესამე ქვეყნების გავლით ხვდება კრემლის ხელში“, – თქვა მან.
გარდა ამისა, ფონ დერ ლაიენმა აღნიშნა, რომ ფიქსირდება სავაჭრო ნაკადების ზრდა რუსეთის ფედერაციასა და ზოგიერთ მესამე ქვეყანას შორის.
„თუ დავინახავთ, რომ ევროკავშირიდან საქონელი იგზავნება მესამე ქვეყნებში და შემდეგ ის გამოჩნდება რუსეთში, მაშინ წევრ ქვეყნებს ამ საქონლის ექსპორტზე სანქციების დაწესებას შევთავაზებთ“, – დასძინა ევროკომისიის ხელმძღვანელმა.
მან განმარტა, რომ ეს ინსტრუმენტი გამოყენებული იქნება „ძალიან ფრთხილად” და რისკების ანალიზისა და ევროკავშირის წევრების თანხმობის შემდეგ.
ფონ დერ ლაიენმა აღნიშნა, რომ ევროკავშირის წევრი ქვეყნები აქტიურად მუშაობენ Rosatom-ის წინააღმდეგ სანქციების შემოღების საკითხზე.
„ეს რთული სამუშაოა… მაგრამ ზოგიერთ წევრ ქვეყანასთან უკვე არის პროგრესი და ჩვენ უნდა გავაგრძელოთ მათი ამ მიმართულებით ზეწოლა”, – თქვა ლაიენმა.
