რუსეთის დუმის დეპუტატი – სერგეი გავრილოვი ამბობს, რომ რუსეთსა და საქართველოს შორის პირდაპირი ფრენების აღდგენის შემდეგ, ორ ქვეყანას შორის დიპლომატიური ურთიერთობებიც აღდგება.
„ვფიქრობთ, ფრენების განახლების შემდგომი ნაბიჯი იქნება დიპლომატიური ურთიერთობების აღდგენა რუსეთსა და საქართველოს შორის, ელჩების გაცვლა“, – ამბობს გავრილოვი.
მისი შეფასებით, დიპლომატიური ურთიერთობის აღდგენის შესაძლებლობა შექმნა საქართველოს თავშეკავებულმა პოზიციამ, რომელიც უკრაინის საკითხზე გამოიჩინა.
„ჩვენს ხალხებს შორის არის მჭიდრო კავშირი. ჩვენ გვაქვს საერთო სულიერი და მორალური ღირებულებები, კულტურა“, – თქვა სერგეი გავრილოვმა.
მოსკოვმა საქართველოსთან პირდაპირი ავიამიმოსვლა სწორედ გავრილოვის თბილისში ვიზიტის შემდეგ გააუქმა, როცა მის მიერ პარლამენტის თავმჯდომარის სკამის დაკავებამ რუსთაველზე საპროტესტო აქციები გამოიწვია.
