პირველად თანამედროვე ისტორიაში, ჩეხეთმა მთლიანად უარი თქვა რუსეთისგან ბუნებრივი აირის მიღებაზე. რუსეთიდან გაზი ქვეყანაში 2023 წლის პირველ კვარტალში საერთოდ არ შემოსულა. ამის შესახებ ინფორმაცია ჩეხეთის მრეწველობისა და ვაჭრობის სამინისტრომ გაავრცელა.
წლის დასაწყისიდან ჩეხეთი ბუნებრივ აირს ნორვეგიიდან იღებს, ხოლო თხევადი გაზი ბელგიიდან და ნიდერლანდებიდან შედის.
„ეს არის დიდი წარმატება. არ ვიცი სხვა ქვეყანა, რომელმაც ერთ წელიწადში თავი დააღწია რუსეთის გაზზე თითქმის 100%-იან დამოკიდებულებას. მოხმარების შემცირებამ გადამწყვეტი როლი ითამაშა“, –განმარტა მრეწველობისა და ვაჭრობის მინისტრმა.
ჩეხეთში ბუნებრივი აირის მოხმარება 1-ელი იანვრიდან 16 აპრილამდე პერიოდში 13,6%-ით – 2,9 მილიარდ კუბურ მეტრამდე შემცირდა. ეს 19,7%-იანი კლებაა ბოლო სამი წლის საშუალო მოხმარებასთან შედარებით.
ქვეყანას ამჟამად 1,67 მილიარდი კუბური მეტრის მარაგი აქვს, რაც ყველაზე დიდი მოცულობაა 2015 წლის შემდეგ.
