შინაგან საქმეთა სამინისტრო პარლამენტთან მიმდინარე საპროტესტო აქციაზე 66 პირის დაკავებას ადასტურებს. დაკავებულთა შორის არის პარტია გირჩი-მეტი თავისუფლების ლიდერი ზურაბ ჯაფარიძე.
შსს-მ გამოძიება საქართველოს სისხლის სამართლის კოდექსის 353-ე პრიმა და 187-ე მუხლებით დაიწყო, რაც ჯარიმას ან ადმინისტრაციული პატიმრობას ითვალისწინებს. .
შსს-ის მიერ გავრცელებულ განცხადებაში აღნიშნულია, რომ აქციაზე ადგილი ჰქონდა ძალადობრივ ინციდენტებს, რის გამოც გამოძიება საქართველოს სისხლის სამართლის კოდექსის 353-ე პრიმა და 187-ე მუხლებით დაიწყო.
შსს აღნიშნავს, რომ შეკრებილთა პროტესტი გამოხატვის თავისუფლებისა და მშვიდობიანი შეკრების კანონით დადგენილ ფარგლებს გასცდა და ძალადობრივი ხასიათი მიიღო. ხოლო პოლიციამ თანმიმდევრულად პროპორციული ძალა გამოიყენა.
შინაგან საქმეთა სამინისტროს განცხადებით, აქციის მონაწილეებმა საკანონმდებლო ორგანოს შენობას ცეცხლი წაუკიდეს, ესროლეს ქვები, ჩაამსხვრიეს მინები და დააზიანეს რკინის დამცავი ჯებირები.
„შეკრებილთა ძალადობრივი ქმედებების შედეგად დაშავდა შინაგან საქმეთა სამინისტროს 50-მდე თანამშრომელი, მათ შორის რამდენიმეს დასჭირდა ქირურგიული ჩარევა და ამ დრომდე რჩებიან სამედიცინო დაწესებულებებში. აქციის მიმდინარეობისას, დაზიანებები მიიღეს მოქალაქეებმაც.
სამინისტრო შეისწავლის აქციის მსვლელობისას მომხდარ ყველა კანონსაწინააღმდეგო ფაქტს და თითოეულ ქმედებას მისცემს შესაბამის სამართლებრივ შეფასებას“, – ნათქვამია შსს-ს მიერ გავრცელებულ ინფორმაციაში.
