შვეიცარიის ხელისუფლებამ უარით უპასუხა G7-ის ელჩებს, გაწევრიანდეს სამუშაო ჯგუფში, რომელიც სანქცირებულ რუსულ აქტივებს მოიძიებს.
ამის შესახებ ნათქვამია შვეიცარიის ეკონომიკური საკითხებში სახელმწიფო სამდივნოს (SECO) წერილში, რომელიც G7-ს გაეგზავნა.
როგორც SECO აღნიშნავს, შვეიცარიის ხელისუფლება მჭიდროდ თანამშრომლობს პარტნიორ ქვეყნებთან სამართლებრივი და ადმინისტრაციული დახმარების ფარგლებში, მაგრამ უარს ამბობს, გაყინოს რამდენიმე რუსული აქტივი, რომელსაც G7 სთავაზობს.
„ტექნიკურ დონეზე თანამშრომლობა შეუფერხებლად მიმდინარეობს და, შესაბამისად, შვეიცარია ჯერ ვერ ხედავს REPO-ს სამუშაო ჯგუფში ოფიციალურად გაწევრიანების აუცილებლობას“, –ნათქვამია შვეიცარიის ეკონომიკურ საკითხებში სახელმწიფო სამდივნოს წერილში.
ამასთან, აღნიშნულია, რომ შვეიცარიამ შეიძლება თანხმობა თქვას, „თუ მომავალში გაწევრიანება იქნება შვეიცარიის ინტერესებში“.
ცნობისთვის, შვეიცარიამ აპრილის დასაწყისში მიიღო წერილი G7-ის ქვეყნის ელჩებისგან, სადაც ის გაკრიტიკებული იყო იმ ხარვეზების გამო, რომლითაც რუსეთის აქტივებს საშუალება აქვთ, აიცილონ სანქციები, რაც „რეპუტაციულ რისკს“ უქმნის ქვეყანას.
