შვეიცარიაში გრძელდება ოთხი ბანკირის სასამართლო პროცესი, რომლებსაც ვლადიმერ პუტინის კუთვნილი ათობით მილიონი ფრანკის გადამალვაში ედებათ ბრალი .
„პუტინის საფულე“
სამი რუსი და ერთი შვეიცარიის მოქალაქე რუსული გაზპრომბანკის შვეიცარიის ფილიალს ხელმძღვანელობდნენ. მათ ადანაშაულებენ, რომ დაეხმარნენ სერგეი როლდუგინს, პუტინის ახლო მეგობარს, რომელსაც „პუტინის საფულეს” უწოდებენ, ფული გადაემალა შვეიცარიის საბანკო ანგარიშებზე გადასახადის გარეშე.
როლდუგინი პუტინის უფროსი ქალიშვილის, მარიას ნათლიაა. მას 2014-2016 წლებში ბანკის ანგარიშებზე $50 მილიონი აქვს შეტანილი, იარაღის მწარმოებელი კომპანიების მეშვეობით.
საბრალდებო დასკვნაში წერია, რომ „ბანკირებმა არ ჩაატარეს საკმარისი შემოწმება იმის დასადგენად, იყო თუ არა როლდუგინი ამ ფულის ნამდვილი მფლობელი”, როცა მედიაში არაერთი სტატია იყო გამოქვეყნებული, რომ რუსი მუსიკოსი პუტინის ახლო მეგობარი და შვილის ნათლია იყო.
„ბანკირები დამნაშავეები არიან და უნდა დაისაჯონ”- აცხადებს შვეიცარიის პროკურატურა.
საბრალდებო დასკვნაში ისიც წერია, რომ პუტინის ოფიციალური შემოსავალი მხოლოდ 100,000 შვეიცარიული ფრანკია, მაგრამ რეალურად უზარმაზარ ფინანსურ აქტივებს ფლობს, რომლებსაც მასთან დაახლოებული პირები მართავენ
როლდუგინმა, ვიოლონჩელისტმა და დირიჟორმა, მანამდე განაცხადა, რომ ის არ არის ბიზნესმენი და არც მილიონერია. ცნობისთვის, Panama Papers-მა როლდუგინი, როგორც პუტინის „საფულე“, 2016 წელს ამხილა. ამავე დროს, როლდუგინი დასავლეთის ქვეყნებმა სანქცირებულთა სიაში შეიყვანეს.
მისი ადვოკატი ირწმუნება, რომ ფული როლდუგინს ეკუთვნის. ხოლო შვეიცარიის პროკურატურა ამტკიცებს, რომ ხელთ აქვთ აშკარა მტკიცებულებები, რომლებიც ადასტურებს, რომ ფული როლდუგინის არ არის.
პუტინმა ადრე აღნიშნულ ბრალდებაზე განაცხადა, რომ როლდუგინი არის მისი მეგობარი, ბრწყინვალე მუსიკოსი და ეს თანხა მან პატიოსნად გამოიმუშავა, კერძოდ, რუსული კომპანიაში მისი წილიდან მიიღო.
ცნობისთვის, შვეიცარიული ბანკები ვალდებულნი არიან შეწყვიტონ საქმიანი ურთიერთობები, თუ არსებობს ეჭვები კლიენტის ვინაობასთან დაკავშირებით.
