პეკინი აცხადებს, რომ შეერთებულმა შტატებმა ჩინეთის მიმართ დამოკიდებულება უნდა შეცვალოს:
„შეერთებულმა შტატებმა უნდა შეცვალოს თავისი „დამახინჯებული“ დამოკიდებულება ჩინეთის მიმართ, წინააღმდეგ შემთხვევაში, ამას მოჰყვება „კონფლიქტი და დაპირისპირება“, – განაცხადა ჩინეთის საგარეო საქმეთა მინისტრმა ჩინ განგმა.
ჩინეთი უკმაყოფილებას გამოთქვამს შეერთებული შტატების მიერ ჩინური კომპანიებისთვის დაწესებული შეზღუდვების გამო. რამდენიმე დღის წინ აშშ-მ შეზღუდვები დაუწესა ჩინურ ტექნოლოგიურ კომპანია Inspur-ს. სერვერების მწარმოებელი ჩინური კომპანია აშშ-ის ვაჭრობის დეპარტამენტმა შავ სიაში შეიყვანა. უწყება ვარაუდობს, რომ ჩინური კომპანია ამერიკაში შეძენილ პროდუქციას ჩინეთის სამხედრო წარმოებისთვის იყენებს. ამის გამო, დეპარტამენტმა ამერიკულ კომპანიებს Inspur-თან მუშაობისგან თავის შეკავებისკენ მოუწოდა.
ჯერ კიდევ 2020 წელს, აშშ-ს თავდაცვის დეპარტამენტმა განაცხადა, რომ Inspur ჩინურ არმიასთან იყო დაკავშირებული, რის გამოც Intel-მა შეაჩერა მისთვის ჩიპების მიყიდვა. თუმცა, სანქციები არ დაწესებულა და გაყიდვები ისევ განახლდა.
წლებია, ორ სახელმწიფოს შორის დაძაბული ურთიერთობაა. მათ შორის ტაივანის, ვაჭრობის საკითხებისა და ახლა უკვე უკრაინის ომის გამო. ურთიერთობა კიდევ უფრო გაუარესდა გასულ თვეში, როცა აშშ-ის აღმოსავლეთ სანაპიროზე სადაზვერვო საჰაერო ბურთი ჩამოაგდეს, რომელიც, თეთრი სახლის თქმით, ჩინელების მიერ იყო გაშვებული.
თეთრი სახლი აცხადებს, რომ ჩინეთთან კონფლიქტი არ სურს. თუმცა, ჩინ განგმა განაცხადა, რომ ეს ნიშნავს იმას, რომ ჩინეთი უპასუხოდ დატოვებს ცილისწამებას ან თავდასხმებს..
ამასთანავე, ჩინეთი არ იცვლის თავის პოზიციას უკრაინის ომთან დაკავშირებით და ინარჩუნებს მჭიდრო კავშირს რუსეთთან.
