ქართული ოცნება პრეზიდენტის მიერ წარდგენილ ეროვნული ბანკის საბჭოს წევრობის კანდიდატებს მხარს არ დაუჭერს, – ამის შესახებ პარტიის თავმჯდომარემ ირაკლი კობახიძემ განაცხადა. მისი თქმით, გადაწყვეტილების მიღებამდე კონსულტაციები უნდა გამართულიყო. მაგრამ ეს წესი დაირღვა, ამიტომ ისინი სალომე ზურაბიშვილის შერჩეულ კანდიდატებს მხარს არ დაუჭერენ.
„ჩვენ მხარს არ დავუჭერთ შესაბამის კანდიდატურებს, რომლებიც კონსულტაციების გარეშე იქნა წარმოდგენილი. ნებისმიერ დემოკრატიულ ქვეყანაში არის შემდეგი სტანდარტული პრაქტიკა: როდესაც ორი ორგანო არის ჩართული თანამდებობის პირების განწესებაში, ამ გადაწყვეტილების მიღებას წინ უსწრებს კონსულტაციები, რაც ამ შემთხვევაში დაირღვა. მეორე, გვარებს არც დავასახელებ, მაგრამ ერთ-ერთი კანდიდატი პირდაპირ არის დაკავშირებული კონკრეტულ პოლიტიკურ ძალასთან, ეს არის „ნაციონალური მოძრაობა“, მის ლიდერებთან მეგობრობს და ასე შემდეგ“, – განაცხადა ირაკლი კობახიძემ.
სალომე ზურაბიშვილმა ეროვნული ბანკის საბჭოს წევრის 2 ვაკანტურ თანამდებობაზე გიორგი ბაქრაძისა და ვიქტორ ჯაფარიძის კანდიდატურები პარლამენტს 16 ივნისს წარუდგინა.
