„დროა, ქართველებისგან მაგალითი ავიღოთ”, „ქართველებს აქვთ მომავალი ევროკავშირში”, „ტაშს ვუკრავ საქართველოში დემონსტრანტების მიერ გამოჩენილ სიმამაცეს”,- ასე შეაფასეს 14 მარტს, ევროპარლამენტში „აგენტების შესახებ” კანონის წინააღმდეგ თბილისში გამოხატული პროტესტი.
ევროპარლამენტში 14 მარტს გამართული დებატები საქართველოში მიმდინარე მოვლენებს ეძღვნებოდა. დებატებში მონაწილე დეპუტატებმა აღნიშნეს, რომ ქართველი ხალხის პროტესტმა კიდევ ერთხელ აჩვენა, რომ მათ ევროკავშირში უნდათ.
„გხედავთ და თქვენ გვერდით ვართ!” – ასე მიმართა უნგრელმა დეპუტატმა კატალინა ჩემ „პროევროპულ ძალებს საქართველოში”.
„ტაშს ვუკრავ საქართველოში დემონსტრანტების მიერ გამოჩენილ სიმამაცეს” – აღნიშნა გამოსვლისას ლატვიელმა დეპუტატმა სანდრა კალნიეტემ, რომელიც „ევროპის სახალხო პარტიას” წარმოადგენს.
კატალინა ჩემ გაიხსენა ქართველი დემონსტრანტი, რომელიც თბილისში ევროკავშირის დროშას აფრიალებდა წყლის ჭავლის პირისპირ. „ეს ძალიან ძლიერი სიმბოლოა, რომელიც აჩვენებს, რამდენს ნიშნავს ევროპული პროექტი” ქართველი ხალხისთვის.
„დროა, ქართველებისგან ავიღოთ მაგალითი და ვიბრძოლოთ ევროპული მომავლისთვის.ქართველი ხალხი იმსახურებს ევროკავშირში ყოფნას, მაშინაც კი, თუკი მათი ხელისუფლება ამას არ იმსახურებს”,-განაცხადა გერმანელმა დეპუტატმა ვიოლა ფონ კრამონმა.
ქართველი ხალხის მიმართ გამოთქმული საქებარი სიტყვების პარალელურად დეპუტატები საქართველოს ხელისუფლება მკაცრად გააკრიტიკეს. მათ შეახსენეს ხელისუფლებას, რომ ქვეყანა ევროკავშირის 12 რეკომენდაციის გარეშე ევროკავშირის კანდიდატის სტატუსს ვერ მიიღებს.
„მინდა ერთი რამ შევახსენო საქართველოს მთავრობას, აქ თქვენი ნების საწინააღმდეგოდ არ ვართ. თქვენ გაქვთ ასოცირების შეთანხმება, თავისუფალი სავაჭრო სივრცე. თქვენ გინდათ რომ კანდიდატის სტატუსი მიიღოთ, ყველაფერს აკეთებთ, რომ დაგვიახლოვდეთ, მაგრამ ყოველ ნაბიჯზე ქვას გვესვრით.
ასე რომ, თუ გინდათ, რომ ევროკავშირს დაუახლოვდეთ მხოლოდ იმისთვის, რომ ქვები უფრო ახლო მანძილიდან ისროლოთ, მაშინ არა მგონია, რომ შევთანხმდეთ.
აირჩიეთ ვის მხარეს ხართ, ან ჩვენ არჩევანი აღარ ვიქნებით”, – მიმართა საქართველოს ხელისუფლებას ევროპარლამენტარმა მარკეტა გრეგოროვამ.
„არავის არ სურს, რომ საქართველომ გახსნას მეორე ფრონტი. ასე რომ, შეწყვიტეთ ეს სასოწარკვეთილი პუტინური დემონიზაცია და რეალურ წინსვლას მიაღწიეთ 12 რეკომენდაციის საკითხში, კოსმეტიკური შესწორებების გარეშე. თუ ამას არ იზამთ, ქართველი ხალხი მოგთხოვთ პასუხს“, -განაცხადა ირლანდიელმა დეპუტატმა მიკ უოლესმა.
„12 პრიორიტეტი ერთადერთი გზაა ქვეყნისთვის, რომ არჩეულ ევროპულ გზაზე წინ წაიწიოს. ჩვენ გვერდში ვუდგავართ, მაგრამ არ შეგეშალოთ: ეს მხოლოდ საქართველოს მთავრობისა და პარლამენტის შესრულებულია”,- მიმართა საქართველოს ხელისუფლებას სამეზობლო პოლიტიკისა და გაფართოების საკითხებში ევროკომისარმა ოლივერ ვარჰეიმ.
„ძალიან კარგად ვიცით, რამდენადაც უნდა ქართველ ხალხს ევროკავშირში გაწევრიანება. მაგრამ დღეს საქართველოს, როგორც სახელმწიფოს, პრობლემა აქვს იმაში, თუ როგორ მიაღწიოს ასეთ სტრატეგიულ მიზანს. და ამ პრობლემის სახელია ბიძინა ივანიშვილი“, – განაცხადა დებატებზე ლიეტუველმა დეპუტატმა ანდრიუს კუბილიუსმა.
დებატებზე გამოჩნდა, რომ ევროპარლამენტში საქართველოს ხელისუფლების მხრიდან მომავალში სიტუაციის გამოსწორებას სკეპტიკურად უყურებენ და გამოითქვა ვარაუდი, რომ „აგენტების კანონის” ჩაგდებით პროვოკაციები არ დასრულდება.
„ნუ ვიქნებით გულუბრყვილოები. ეს არაა ხელისუფლების მხრიდან უკანასკნელი პოლიტიკური ანტიევროპული პროვოკაცია”, – თქვა ანდრიუს კუბილიუსმა.
