ფინეთი ოფიციალურად გახდა NATO-ს 31-ე წევრი სახელმწიფო. ფინეთის დროშა აღიმართა ბრიუსელში, NATO-ს შტაბ-ბინაში, ალიანსის სხვა 30 წევრი ქვეყნის დროშების გვერდით. საზეიმო ცერემონიას ფინეთის პრეზიდენტი საული ნიინისტო და მთავრობის წევრები დაესწრნენ.
ფინეთის ალიანსში გაწევრიანების პროცესი რუსეთის პრეზიდენტის – პუტინის უკრაინაში შეჭრამ დააჩქარა.
„ის ზუსტად საპირისპიროს იღებს… დღეს ფინეთი და მალე ასევე შვედეთი გახდება ალიანსის სრულუფლებიანი წევრი“, – განაცხადა NATO-ს გენერალურმა მდივანმა იენს სტოლტენბერგმა.
კრემლი აცხადებს, რომ ფინეთის გაწევრიანებაზე მისი პასუხი უკრაინაში კონფლიქტის კიდევ უფრო გამწვავება იქნება.
ფინეთის გაწევრიანების შემდეგ ორმაგდება NATO-ს საზღვრის სიგრძე რუსეთთან. შესაბამისად, ალიანსის სამხედრო ძალები უფრო ახლოს იქნებიან რუსეთთან.
ფინეთის თავდაცვის ძალებმა განაცხადეს, რომ აშშ-ის და სხვა მოკავშირე საჰაერო ძალებმა სათვალთვალო ფრენები უკვე დაიწყეს ფინეთის საჰაერო სივრცეში.
