18 მარტიდან ფასის ზედა ზღვარი დამატებით, 300-ზე მეტ ქრონიკულ და ონკოლოგიურ მედიკამენტზე დაწესდა. ჯანდაცვის სამინისტროს ინფორმაციით, საერთო ჯამში, ფასის ზედა ზღვარი, უკვე 1 100-ზე მეტ წამალზე მოქმედებს და აღნიშნული მედიკამენტების სია, უახლოეს მომავალში, კიდევ გაიზრდება.
აფთიაქებს მედიკამენტების აღნიშნულ ფასზე ძვირად გაყიდვა ეკრძალებათ.
„ცვლილების მიხედვით, ფარმაცევტულმა კომპანიებმა დადგენილი ფასებით უნდა იხელმძღვანელონ. იმ შემთხვევაში, თუ აფთიაქები მედიკამენტებს, აღნიშნულ ფასზე ძვირად გაყიდიან, დაჯარიმდებიან“ – წერია ჯანდაცვის სამინისტროს განცხადებაში.
უწყების განმარტებით, რეფორმის მიზანი ქვეყანაში წამლის ღირებულების შემცირებაა. ჯანდაცვის სამინისტრო აცხადებს, რომ რეფერენტული ფასის განსაზღვრის შედეგად, მედიკამენტები საშუალოდ, 40%-ით გაიაფდება. რეფერენტული ფასწარმოქმნის მექანიზმი ეტაპობრივად სხვა ჯგუფის მედიკამენტებზეც ამოქმედდება.
უწყება განმარტავს, რომ რეფერენტული ფასი ორიგინალისა და მისი ანალოგი გენერიკებისთვის განსხვავებულია, რაც ბაზარზე საერთაშორისო ბრენდების ინტერესს დააზღვევს. მედიკამენტებზე ფასების ზედა ზღვრის დადგენა 2023 წლის 15 იანვრიდან დაიწყო.
მედიკამენტების ჩამონათვალისა და მაქსიმალური ზღვრული ფასის შესახებ ინფორმაცია განთავსებული მითითებულ გვერდზე – https://referenceprice.moh.gov.ge/ui/#/main
