ფარმაცევტული ბიზნესი ზოგიერთი დასახელების მედიკამენტის გაძვირებას თურქეთში ფასების ზრდით ხსნის. ფარმაცევტული კომპანიების ასოციაცია განმარტავს, რომ კომპანიებს რეფერენტული ფასების შესახებ სამინისტროს ბრძანება არ დაურღვევიათ, რადგან ფასის მომატებას კანონი არ კრძალავს.
„კომპანია თავად გადაწყვეტს, რა ფასი დაადოს თავის წამალს“, – ასე პასუხობს ასოციაციის აღმასრულებელი დირექტორი ილონა კოკიაშვილი ჯანდაცვის სამინისტროს, რომელმაც ფარმაცევტული ბიზნესი ფასების ხელოვნურ ზრდაში დაადანაშაულა.
„შესაძლოა, გადაფასების პერიოდში მოხდა რიგ მედიკამენტებზე ფასების არასწორად დადგენა ან ცვლილება, მაგრამ ესაა ცოცხალი სამუშაო პროცესი. იმ მედიკამენტებზე, რომელზეც არაა დაწესებული რეფერენტული ფასი, თავისუფალი ბაზრის პრინციპები მოქმედებს”, – განაცხადა კოკიაშვილმა.
ფარმაცევტული კომპანიების წარმომადგენელთა ასოციაციის ხელმძღვანელის – ირაკლი მარგველაშვილის განცხადებით, თურქეთის მთავრობის გადაწყვეტილებით, 2022 წლის 13 დეკემბერს მედიკამენტების ფასები 36.7% გაიზარდა, რაც გაცვლითი კურსის ცვლილებას უკავშირდება.
მისი თქმით, მნიშვნელოვნად შეიზღუდა თურქეთიდან წამლების გატანა სხვა ქვეყნებში, რაც წამლის ფასზეც აისახა. მარგველაშვილის თქმით, ამ სიტუაციაში ერთ-ერთი გამოსავალი ის არის, რომ მოხდეს ერთს მხრივ, მომწოდებლის და მეორე მხრივ, საბითუმო რეალიზატორის ფასნამატის დარეგულირება.
„მაშინ აღარ იქნება საუბარი იმაზე, რომ ვიღაცამ 200% დაამატა და ვიღაცამ – 300. ფიქსირებული იქნება, რამდენი დაამატოს,“ – განაცხადა მარგველაშვილმა.
წყარო: jandacva.ge
