საქართველოში უმაღლეს სასწავლებლებში ჩარიცხული უცხოელი სტუდენტების რიცხვი ბოლო 10 წლის განმავლობაში, წლიურად საშუალოდ 22.3%-ით იზრდება. 2022-23 სასწავლო წლისთვის მათი რიცხვი 20 690-მდე გაიზარდა და სტუდენტების საერთო რაოდენობის 12.6%-ს შეადგინა.
შესაბამისად, იზრდება მათი ფინანსური წვლილი ქვეყნების ეკონომიკაში. PMCG-ის კვლევამ აჩვენა, რომ 2020-2021 სასწავლო წელს, უცხოელ სტუდენტებს, მათ უცხოელ მეგობრებსა და ოჯახის წევრებს, საქართველოში $132 მილიონის ღირებულების ცხოვრების ხარჯი ჰქონდათ გაწეული. ამ ციფრების გათვალისწინებით, PMCG-ის მკვლევრები უცხოელი ტურისტების მოზიდვას ქვეყნის ეკონომიკისთვის მნიშვნელოვნად მიიჩნევენ.
ხარჯების ზრდა ნაწილობრივ სწავლის საფასურის ზრდამ გამოიწვია. 2022-2023 სასწავლო წლისთვის უცხოელი სტუდენტების მიერ გადახდილი სწავლის საფასურის ჯამური ოდენობა 14 მილიონიდან 260 მილიონ ლარამდე გაიზარდა, საშუალო წლიური ზრდის ტემპმა კი 39% შეადგინა. მიმდინარე სასწავლო წლისთვის საშუალო გადასახადი 4,300-დან 9,400 ლარამდე გაიზარდა.
სწავლის საფასური ლარში 14%-ით არის მომატებული, დოლარში კი – 30%-ით. 2022-2023 სასწავლო წელს, უცხოენოვან პროგრამებს შორის ყველაზე მაღალი ფასი ჰქონდა დიპლომირებული მედიკოსის ამერიკულ პროგრამას – 37 000 ლარი. შედარებისთვის, 2013-2014 წლებში ყველაზე მაღალი ფასი საერთაშორისო ურთიერთობების პროგრამაზე ფიქსირდებოდა – 8150 ლარი.
