უცხოელ მოქალაქეებს სუროგაციასთან ერთად, საქართველოში ინვიტრო განაყოფიერებაც აეკრძალებათ. ამ საკითხზე განმარტება მთავრობის სხდომის დასრულების შემდეგ საქართველოს ჯანდაცვის მინისტრმა ზურაბ აზარაშვილმა გააკეთა.
მინისტრის თქმით, თუ ინვიტრო განაყოფიერება იქნება ერთ-ერთი საშუალება საქართველოს მოქალაქეების გამრავლებისთვის, მაშინ ის დაშვებული მხოლოდ საქართველოს მოქალაქეებისთვის იქნება. მისი თქმით, ამ მიმართულებით რეგულირება არ ხდებოდა, რაც ბევრ სხვადასხვა პრობლემას აჩენდა, რაც ბავშვებით ვაჭრობასთან შეიძლებოდა ყოფილიყო დაკავშირებული.
„მედიცინის დახმარებით რეპროდუქციის საკითხები იქნება დაშვებული მხოლოდ საქართველოს მოქალაქეებისთვის. მხოლოდ საქართველოს მოქალაქეებს შეეძლებათ ინვიტრო განაყოფიერების მეთოდით შვილის გაჩენა…
ძალიან დიდი გამოწვევაა ორგანოებით ვაჭრობა, სხვა ყველა ის არაეთიკური თუ მიუღებელი ფორმა, რაც შეიძლება ამ საკითხს თან ახლდეს. კანონშივეა ჩანაწერი, რომ ქვეყანაში ამ ტიპის ყველანაირი რეკლამა იკრძალება. ხშირად შეგხვედრიათ ალბათ სხვადასხვა შეთავაზება და რეკლამები სუროგაციასთან დაკავშირებული, ან ინვიტრო განაყოფიერებასთან, ეს სამწუხარო პრაქტიკა ამით დარეგულირდება და მოისპობა“, – განაცხადა ჯანდაცვის მინისტრმა.
ჯანდაცვის მინისტრის ინფორმაციით, შესაბამისი კანონპროექტი პარლამენტს მიმდინარე კვირაში გადაეგზავნება და ცვლილება სავარაუდოდ, შემოდგომაზე დამტკიცდება. კანონი ახალი რეგულაციით 2024 წლის პირველ იანვარს უნდა შევიდეს ძალაში.
