საქსტატის მონაცემებით, 2022 წლის IV კვარტალში საქართველოში უმუშევრობის დონე წინა წლის შესაბამის პერიოდთან შედარებით 3%-ით არის შემცირებული და 16.1% შეადგენს.
რამ გამოიწვია უმუშევრობის შემცირება? რა ციფრებზე დაყრდნობით აცხადებს ამას სტატისტიკის სამსახური?
საქსტატი ეყრდნობა დაქირავებულთა რაოდენობას, რომელიც მათი მონაცემებით, 2022 წლის ოქტომბერ-დეკემბერში წინა წლის შესაბამის პერიოდთან შედარებით, 42.9 ათასი კაცით (5.1%) გაიზარდა და 884.1 ათასს მიაღწია, ხოლო თვითდასაქმებულთა რიცხვი გაიზარდა 18 ათასით (4.5%), 420.4 ათასამდე.
ოფიციალური სტატისტიკის მიხედვით, გაიზარდა სამუშაო ძალის წილი 15 წლის და უფროსი ასაკის მოსახლეობაში, წინა წლის შესაბამის პერიოდთან შედარებით, 1.5% პროცენტით და 52.7% შეადგინა, ხოლო დასაქმების დონე 2.8%-ით გაიზარდა და 44.2% შეადგინა.
დასაქმების დონე უფრო მეტად არის გაზრდილი ქალაქის ტიპის დასახლებებში 3%-ით, ხოლო სოფლის ტიპის დასახლებებში- 2.3%-ით. ქალაქად დასაქმების დონე(დასაქმებულთა პროცენტული წილი 15 წლის და უფროსი ასაკის მოსახლეობაში) 45.8%-ს, ხოლო სოფლად- 42.1%-ს შეადგენს. შესაბამისად, უმუშევრობის დონე ქალაქად 3.7%-ით, ხოლო სოფლად 1.9% ით არის შემცირებული. დაქირავებულთა წილი დასაქმებულთა საერთო რაოდენობაში 0.1%-ით გაიზარდა და 67.8% შეადგინა.
